Athugið þessi frétt er meira en 2 mánaða gömul.

Hundruðum flugferða aflýst í Bandaríkjunum

epa10046832 Air travelers in the domestic terminal during the busy summer holiday travel weekend at Hartsfield-Jackson Atlanta International Airport in Atlanta, Georgia, USA, 01 July 2022. Airlines are facing widespread delays and cancellations as air travel reaches pre-COVID-19 levels.  EPA-EFE/ERIK S. LESSER
 Mynd: EPA-EFE - EPA
Hundruðum flugferða var aflýst til og frá Bandaríkjunum í dag og eins í innanlandsflugi en landsmenn eru á faraldsfæti í tilefni þjóðhátíðardagsins 4. júlí. Á fjórða þúsund ferða var frestað.

Ástandið var lítið betra í gær þegar tæplega sex hundruð flugferðum var aflýst í Bandaríkjunum og rúmlega þrjú þúsund um allan heim. AFP-fréttaveitan hefur tekið þessar tölur saman af vefnum flightaware.com sem fylgist með flugferðum um víða veröld.

Ekkert verður heldur af fjölda flugferða sem fyrirhugaðar voru á morgun, sunnudag. Meðal skýringa er að flugfélög eigi í basli með að manna flugvélar sínar, einkum skortir flugmenn.

Tölur sýna að um það bil 15 prósent færri starfa hjá félögunum en áður en kórónuveirufaraldurinn skall á. Umsvifin eru orðin um 90% af því sem var fyrir 2020 enda hefur almenningur hefur lagst í ferðalög eftir að sóttvarnartakmörkunum vegna faraldursins var aflétt víða um heim .

Hins vegar hafa borist tíðindi af miklu öngþveiti og miklum töfum á flugvöllum undanfarna daga og vikur. Bandaríkjamenn á faraldsfæti hafa því margir ákveðið að fara heldur akandi ferða sinna innanlands.