Athugið þessi frétt er meira en 5 mánaða gömul.

Bjartsýn á að Tyrkjum snúist hugur

28.06.2022 - 15:54
epa09706745 (L-R) Finnish Foreign Minister Pekka Haavisto, NATO Secretary General Jens Stoltenberg, and Swedish Foreign Minister Ann Linde during a joint press conference at the end of a meeting at the NATO headquarters in Brussels, Belgium, 24 January 2022. The Finnish and Swedish foreign ministers are at NATO for talks on cooperations in the Baltic Sea.  EPA-EFE/STEPHANIE LECOCQ
Utanríkisráðherrar Finnlands og Svíþjóðar á fréttamannafundi með Jens Stoltenberg, framkvæmdastjóra NATÓ. Mynd: EPA-EFE
Leiðtogar Finna og Svía funduðu með Tyrklandsforseta í Madríd, þar sem leiðtogafundur Atlantshafsbandalagsins fer fram, í von um að tryggja stuðning við aðildarumsóknir ríkjanna tveggja. Tyrkir hafa ekki látið haggast og standa enn einir gegn umsóknunum.

Sauli Niinistö, forseti Finnlands, og Ann Linde, utanríkisráðherra Svíþjóðar, sögðu frá því að nokkur árangur hefði náðst í viðræðunum við Tyrklandsstjórn. Linde sagðist við Svenska Dagbladet vonast til þess að hægt væri að stíga stórt skref á leiðtogafundinum en kvaðst reiðubúin undir að viðræðurnar gætu tekið lengri tíma. 

Viðræður hafa staðið yfir frá því ríkin tvö sóttu um í maí en strax þá lýstu Tyrkir andstöðu við umsóknirnar.

Hvert aðildarríki hefur neitunarvald þegar kemur að stækkun NATO. Tyrkir bera því fyrir sig að Finnar og Svíar skjóti skjólshúsi yfir hryðjuverkamenn úr röðum Verkamannaflokks Kúrda, sem Atlantshafsbandalagið telur til hryðjuverkasamtaka. Hefur Erdogan leitast eftir því að fá það tryggt að ríkin tvö bregðist við þessum aðfinnslum.

Búist er við því að Erdogan fundi sömuleiðis með Joe Biden, forseta Bandaríkjanna, meðan á leiðtogafundi stendur. Þeir greinendur sem breska ríkisútvarpið ræddi við sögðu að sá fundur gæti skipt sköpum og ráðið úrslitum um hvort Tyrkir samþykki umsóknir Finnlands og Svíþjóðar.