Norðmenn hækka stýrivexti

Ida Wolden Bache seðlabankastjóri sagði í tilkynningu að möguleikinn á löngu verðbólguskeiði auki þörfina á meiri hækkunum en áður var gert ráð fyrir. Með þessari hækkun sé dregið úr hættunni á því að verðbólga haldist mikil.

Þá býst seðlabankastjóri við að hækka stýrivexti í 1,5 prósent í ágúst. Bankinn býst við því að vextirnir verði komnir í þrjú prósent næsta sumar en hafði áður gert ráð fyrir 2,5 prósenta stýrivöxtum í árslok 2023. 

Verðbólga mældist 5,7 prósent í noregi í maí og vegur hækkandi orkuverð þar einna þyngst. Að fráskildu orkuverði hækkaði verðlag um 3,4 prósent.

Sem kunnugt er hækkaði Seðlabanki Íslands stýrivexti um heilt prósentustig í gær, og standa þeir nú í 4,75 prósentum hér.