Athugið þessi frétt er meira en 2 mánaða gömul.

„Nú er nóg komið“

Mynd með færslu
 Mynd: Elsa María Guðlaugs Drífudót - RÚV
Bæjarstjórn Vesturbyggðar og sveitarstjórn Tálknafjarðarhrepps segja stjórnvöld verða að bregðast við með tafarlausum úrbótum á farþegaferjunni Baldri.

Þetta kemur fram í yfirlýsingu sem bæjarstjórn og sveitarstjórn sendu sameiginlega frá sér. Í yfirlýsingunni segir að margoft hafi verið bent á það öryggisleysi sem fylgi því að vera með gamalt skip í siglingum yfir Breiðafjörð sem hafi ítrekað bilað. Sveitarstjórn Tálknafjarðarhrepps og bæjarstjórn Vesturbyggðar hafi ítrekað sent frá sér yfirlýsingar um óánægju með ástand mála, átt marga fundi með forsvarsmönnum Vegagerðarinnar og rætt við samgönguyfirvöld um úrbætur. Nú sé nóg komið. 

Farþegaferjan Baldur missti afl rétt utan við hafnarmynnið í Stykkishólmi um 300 metra frá landi rétt eftir brottför klukkan níu í morgun. Um borð eru 102 farþegar auk áhafnar. Þyrla landhelgisgæslunnar var kölluð út auk allra Björgunarsveita á Snæfellsnesi. 

Yfirlýsinguna í heild sinni má lesa að neðan: 

Yfirlýsing frá bæjarstjórn Vesturbyggðar og sveitarstjórn Tálknafjarðarhrepps varðandi Breiðafjarðarferjuna Baldur

Enn og aftur berast fréttir af bilun í Breiðafjarðarferjunni Baldri með yfir hundrað manns um borð. Margoft hefur verið bent á það öryggisleysi sem fylgir því að vera með gamalt skip í siglingum yfir Breiðafjörð sem hefur ítrekað bilað. Að leggja líf fólks í hættu við að sigla með þessu skipi er algjörlega óboðlegt og á ekki að líðast með nokkru móti. Sveitarstjórn Tálknafjarðarhrepps og bæjarstjórn Vesturbyggðar hafa ítrekað sent frá sér yfirlýsingar um ónægju sína með ástand mála, átt marga fundi með forsvarsmönnum Vegagerðarinnar og rætt við samgönguyfirvöld um úrbætur en enn bilar Baldur. Nú er nóg komið og stjórnvöld verða að bregðast við með tafarlausum úrbótum.

Fréttaskýringaþátturinn Kveikur fjallaði um málefni Baldurs í þætti fyrr í vetur.

Fréttin hefur verið uppfærð.