Athugið þessi frétt er meira en 8 mánaða gömul.

Býst við skýrslu Ríkisendurskoðanda í lok mánaðar

Mynd með færslu
 Mynd: Kristinn Þeyr Magnússon - RÚV
Katrín Jakobsdóttir forsætisráðherra mælti á Alþingi í kvöld samkvæmt hefðinni fyrir tillögu sinni um frestun á fundum Alþingis fram í september. Forsætisráðherra minnti þó þingheim á að hún muni leita atbeina forseta Íslands til að kalla þing saman þegar úttekt Ríkisendurskoðanda á bankasölunni verði kynnt en skýrslan sé áætluð í lok júní.

„Alþingi ályktar að veita samþykki til þess að fundum þingsins verði frestað frá 15. júní 2022 eða síðar ef nauðsyn krefur til 13. september 2022 tillagan skýrir sig sjálf. Ég minni þó háttvirta þingmenn á að ég hyggst leita atbeina forseta Íslands til þess að kalla þing saman á ný þegar niðurstöður úttektar ríkisendurskoðanda á sölu á hlut ríkisins í Íslandsbanka verða kynntar en samkvæmt upplýsingum frá embættinu er skýrslan áætluð í lok mánaðar,“ sagði Katrín á Alþingi í kvöld.