Athugið þessi frétt er meira en 4 mánaða gömul.

„Það er grunnt á fordómunum“ segir forsætisráðherra

29.05.2022 - 19:25
Forsætisráðherra segir ofbeldisframkomu ungmenna í garð hinsegin jafnaldra sýna að grunnt sé á fordómum í samfélaginu. Hún sé slegin yfir fréttum af málinu og verið sé að grípa til aðgerða til að uppræta þessa ómenningu.

Hópur hinsegin unglinga á höfuðborgarsvæðinu segist verða fyrir aðkasti daglega, sem á meðal annars rætur sínar að rekja til samfélagsmiðilsins TikTok. Þau segjast jafnvel forðast að fara ein út úr húsi. Foreldrar þeirra lifa í stöðugum ótta og biðla til annarra foreldra að fræða börn sín um skaðsemi eineltis og áreitni, eins og fram kom í fréttum okkar í liðinni viku. Dæmi eru um að krakkarnir hafi verið grýttir, þeim veitt eftirför, gelt að þeim, þeim hótað lífláti og sögðu ungmenni sem rætt var við að vinur þeirra  sem orðið hafði fyrir miklu aðkasti hafi svipt sig lífi í fyrra. Forsætisráðherra er ráðherra jafnréttismála.

„Þetta slær mig auðvitað bara hræðilega. Það er mjög dapurlegt að einhvern veginn svona orðræða líðist í samfélaginu.“

Hún segist vera að setja saman starfshóp sem á að leggja til leiðir um hvernig hægt sé að takast á við hatursorðræðu í samfélaginu,  í honum verða fulltrúar vinnumarkaðar, dómstóla, skóla og hagsmunahópa. Það skipti máli að takast á við hatursorðræðu af hvaða tagi sem er, hún eigi ekki að líðast. Ísland hefur jafnan komið vel út úr rannsóknum á jafnrétti, hvort heldur vegna kyns eða kynhneigðar eða annars. Forsætisráðherra segir Ísland hafa þokast ofar í alþjóðlegum samanburði um réttindi hinsegin fólks, ekki síst vegna lagasetninga undanfarið sem ætlað er að tryggja slíkt. Hins vegar sé það þannig að oft taki lengri tíma fyrir menninguna að breytast í samræmi við lagabreytingarnar. 

„Það er einmitt meðal annars verkefni þessa hóps um hatursorðræðu. Það er ekki bara að horfa á löggjöfina heldur hvernig getum við unnið að því að uppræta þessa ómenningu.“

Hún segir að langt virðist í land með að hægt verði að uppræta meinsemdina. Aðspurð hvort það komi á óvart að fordómarnir gegn hinsegin fólki skuli koma frá ungu fólki sem alist hefur upp við nýrri og breytt viðhorf, segir hún:

„Ég held að þetta sýni okkur bara að það er grunnt á fordómunum, þannig er það nú bara.“