Athugið þessi frétt er meira en 1 mánaða gömul.

Krár innsiglaðar í tengslum við stórt fíkniefnamál

Mennirnir fimm sem eru í haldi lögreglu í tengslum við umfangsmikla rannsókn á fíkniefnalagabrotum og peningaþvætti eru allir íslenskir. Lögregla hefur framkvæmt húsleit víða síðustu daga, meðal annars á öldurhúsum og í hesthúsum, og lagt hald á tugi kílóa af fíkniefnum. 

Lögregla framkvæmdi meðal annars húsleit hér á Gamla enska barnum í Hafnarfirði, stað sem einn sakborninganna rekur, og innsiglaði staðinn fram yfir helgi.

Staðurinn er rekinn af Ólafi Ágústi Hraundal, hann var einn sakborninga í Stóra fíkniefnamálinu svokallaða sem var mjög áberandi um aldamótin.  Hann hlaut þá einn þyngsta dóm sem fallið hafði í fíkniefnamáli hér á landi, eða níu ár. Fjórtán voru dæmdir í málinu. Ólafur Ágúst var handtekinn eftir að lögregla veitti honum eftirför á Reykjanesbraut á föstudag. 

Fimm eru í gæsluvarðhaldi í tengslum við málið, en sumir eiga enga sögu hjá lögreglu. 

Starfsfólk Gamla enska barsins í Hafnarfirði sem fréttastofa ræddi við í dag sagði það hafa komið sér verulega á óvart þegar lögreglu bar að garði, engan hefði grunað að nokkuð misjafnt hefði átt sér stað - en drógu það mjög í efa að staðurinn sjálfur tengdist málinu með neinum hætti. Lögregla hefði innsiglað staðinn og leitað í hverjum króki og kima og ekki gefið heimild til þess að opna staðinn að nýju fyrr en í morgun. 

Húsleit hefur verið gerð mun víðar í tengslum við málið, meðal annars í iðnaðar- og heimahúsum, í hesthúsum, og á barnum Catalinu í Hamraborg, þar sem Ólafur Ágúst starfaði sem lausamaður, að sögn eiganda staðarins. Hann segist vera í algjör áfalli og tekur fram að ekkert hafi fundist á staðnum og að enginn hinna grunuðu hafi komið að rekstri staðarins með neinum hætti. Þar sé allt uppi á borðum og segist harma að staðurinn hafi verið dreginn inn í málið. 

Tíu voru handteknir í tengslum við málið og fimm þeirra úrskurðaðir í gæsluvarðhald, allt íslenskir karlmenn. Um fjörutíu kíló af kannabisefnum voru haldlögð um helgina en Margeir Sveinsson, aðstoðaryfirlögregluþjónn hjá miðlægri deild, hefur ekki viljað tjá sig nánar um málið.