Athugið þessi frétt er meira en 9 mánaða gömul.

Nýja kirkjan færð vegna fornleifafundar í Grímsey

17.05.2022 - 12:04
Mynd með færslu
 Mynd: Hildur Gestsdóttir - RÚV
Við undirbúning kirkjubyggingar í Grímsey fundu fornleifafræðingar gamlar minjar sem gefa vísbendingu um búsetu fljótlega eftir landnám. Vegna uppgötvunarinnar mun nýja kirkjan verða byggð annars staðar en áætlað hafði verið.

Líklega fundin kirkja frá 1300

Fornleifafræðingar frá Fornleifastofnun Íslands voru fengnir til að vakta gröftinn fyrir grunninum að nýrri Miðgarðakirkju. Hildur Gestsdóttir er annar tveggja fornleifafræðinga sem stödd er í Grímsey.

„Þá kom í ljós kirkjugarðsveggur sem við teljum að geti verið kirkjugarðsveggurinn að elstu kirkjunni í Grímsey. Elstu heimildir sem við höfum um kirkju hérna eru frá því um 1300.  Okkur finnst ekki ólíklegt að fundnar séu minjar um elstu kirkju eyjunnar, miðað við það sem við sjáum.“

Færa þarf fyrirhugaða kirkjubyggingu

Hildur segir að auk kirkjuveggsins hafi fundist þar grafir. „Þegar það kom í ljós þá var ákveðið að færa kirkjuna til að hlífa þessum gröfum þannig að hún var sem sagt færð 4 metra í austur.“ 

Miðgarðakirkja stóð í gamla bæjarhólnum í Grímsey og eru fornleifafræðingarnir að skoða þar stóran öskuhaug. Þar eru yngstu lögin líklega frá nítjándu öld en megnið er frá miðöldum - en vísbendingar eru um að búseta hafi verið jafnvel enn fyrr í eyjunni en áður hefur verið talið.

„Í rauninni erum við að sjá mannvist bara fljótlega eftir að landnámsgjóskan fellur, 877. Við getum samt ekki alveg sagt með einhverri vissu hversu löngu eftir það. Í rauninni erum við bara með sögu Grímseyjar frá fyrstu tíð í þessum öskuhaug,“ segir Hildur.