Minnst 27 fórust í eldsvoða á Indlandi

14.05.2022 - 07:37
Erlent · Asía · Indland
A fire official stands on a fire brigade truck to help his colleagues douse a fire in a four storied building, in New Delhi, India, Saturday, May 14, 2022. A massive fire erupted in a four-storied building in the Indian capital on Friday, killing at least 19 people and leaving several injured, the fire control room said. Dozens of people have been rescued from the commercial building, mainly shops, in the Mundka area in the western part of New Delhi. (AP Photo/Manish Swarup)
 Mynd: AP
Minnst 27 fórust í eldsvoða í Nýju Delí, höfuðborg Indlands í gær, og á þriðja tug slösuðust. Eldurinn braust út í fjögurra hæða iðnaðarhúsnæði í vesturborg Delí síðdegis á föstudag að staðartíma. AFP-fréttastofan hefur eftir Satpal Bharadvaj, aðgerðastjóra slökkviliðsins á vettvangi að um 70 manns hafi verið í húsinu þegar eldurinn kviknaði.

„27 illa brunnin lík hafa verið sótt í bygginguna og rúmlega 20 manns slösuðust og njóta aðhlynningar á sjúkrahúsi,“ sagði Bharadvaj. Að hans sögn var enginn brunaútgangur í húsinu og sagði hann flest hinna látnu hafa kafnað. Indverskir fjölmiðlar greina frá því að allt að 40 manns hafi verið flutt á sjúkraús með brunasár.

Þá hefur AFP eftir varðstjóra slökkviliðs að mörg hinna slösuðu hafi meiðst þegar þau forðuðu sér úr eldhafinu með því að stökkva út um glugga á efri hæðum byggingarinnar. Eldsupptök eru ókunn en tveir menn, sem sagðir eru eigendur byggingarinnar, voru handteknir í tengslum við rannsókn málsins.