„Maður var bara öskrandi í græna herberginu“

Mynd: RÚV / RÚV

„Maður var bara öskrandi í græna herberginu“

13.05.2022 - 20:00

Höfundar

Júlía Margrét Einarsdóttir

vefritstjórn

Senda skilaboð

Björg Magnúsdóttir

dagskrárgerðarmaður

Senda skilaboð

Þær Elín Ey úr hljómsveitinni Systur og lagahöfundurinn Lovísa Elísabet Sigrúnardóttir, eða Lay Low, eru enn að ná sér niður eftir æsispennandi þriðjudagskvöld. Hópurinn er samt til í slaginn og Systur tilbúnar að stíga á svið og flytja Með hækkandi sól á nýjan leik á laugardag. Báðar segjast orðnir miklir Eurovision-aðdáendur eftir reynsluna og nú er glimmer í algleymingi hjá hópnum.

Systur komust auðvitað áfram í Eurovision í undankeppninni á þriðjudaginn og eru byrjaðar að hlakka til að fá að flytja lagið Með hækkandi sól á nýjan leik annað kvöld. Björg Magnúsdóttir ræddi við Elínu Ey og Lovísu í Tórínó og spurði þær hvernig stemningin væri eftir rosalegt þriðjudagskvöld. „Maður er svolítið þreyttur en setur bara sólgleraugun upp,“ segir Elín í þættinum Á tali í Tórínó sem var á dagskrá á RÚV í kvöld. „Mér líður bara mjög vel,“ heldur hún áfram. „Orkan er kannski aðeins í lægri kantinum en maður er að taka inn Tórínó, njóta og safna kröftum fyrir laugardaginn.“

Mynd: EBU / EBU

Hér má sjá augnablikið þegar atriði Systra var lesið upp á þriðjudag.

Lovísa tekur undir og segir að allur hópurinn hafi verið dauðþreyttur eftir þriðjudaginn. „Ég held þetta sé svona adrenalínþynnka. Maður var bara öskrandi í græna herberginu og daginn eftir kemur raunveruleikinn bara búmm.“

Íslenski hópurinn var ekki sá eini sem öskraði í höllinni þegar Ísland var lesið upp. Það mátti heyra fagnaðarlætin bergmála um allt og ljóst að Systur eiga sér marga aðdáendur. „Þetta var ótrúlegt,“ segir Elín. „Ég er enn að taka þetta inn, þetta var bara geggjað.“

Lovísa viðurkennir að þeim hafi brugðið að heyra Ísland lesið upp svona snemma. „Við héldum að ef við kæmumst áfram yrðum við lesin upp síðast en mjög gaman, maður fann að það var gaman að fara áfram.“

Elín segir að þær ætli inn í úrslitin á laugardaginn með því hugarfari að þau hafi lagt allt í verkefnið hingað til og haldi því áfram. „Við ætlum að anda, safna kröftum og kjarna okkur fyrir laugardag. Við erum spennt og í góðum gír, ætlum aftur á svið að syngja þetta dásamlega lag og reyna að hafa gaman saman.“ Hún lýsir ferðinni sem flæðisferð þar sem óvissunni er fagnað. „Frá upphafi höfum við verið í flæði, maður veit aldrei hvað gerist næsta dag og þetta er allt einstakt.“

En eru þær orðnar Eurovision-aðdáendur eftir lífsreynsluna? „Ég ákvað að fara í handsnyrtingu í dag og þú varst að tala um glimmer um daginn, það er bara glimmer,“ segir Lovísa og sýnir Björgu glitrandi neglurnar. „Það er algjört glimmer í hópnum. Ég elska þetta allt, ég er Eurovision-fan,“ segir Elín að lokum.

Á tali í Tórínó var á dagskrá á RÚV í kvöld kl. 19.40.