Athugið þessi frétt er meira en 2 mánaða gömul.

Maðurinn sem þyrla gat ekki sótt enn á sjúkrahúsi

Mynd með færslu
 Mynd: rúv
Maðurinn sem slasaðist er bíll fór út af vegi undir Eyjafjöllum í gær er enn á sjúkrahúsi. Í samtali við fréttastofu segir Oddur Árnason, yfirlögregluþjónn lögreglunnar á Suðurlandi, að maðurinn hafi þó reynst minna slasaður en litið hafi út í upphafi.

Fjallað var um í gær að flytja þurfti manninn landleiðina á sjúkrahús í Reykjavík, þar sem þyrla Landhelgisgæslunnar var ekki til taks.

Ásgeir Erlendsson, upplýsingafulltrúi Landhelgisgæslunnar, sagði í samtali við fréttastofu í gær að enginn flugstjóri hefði verið á vakt vegna veikinda og ekki hefði tekist að fá flugstjóra á frívakt í staðinn. „Því gat þyrlusveitin ekki sinnt þessu útkalli,“ segir Ásgeir. Hann segist ekki vita til þess að það hafi gerst áður.

Fram hefur komið í fréttum að sífellt erfiðara hafi verið að manna vaktir á þyrlum Gæslunnar, en flugmenn þeirra og flugstjórar hafa verið án kjarasamnings í á þriðja ár. Spurður hvort það ástand sem nú er uppi tengist kjarasamningum segir Ásgeir engar vísbendingar hafa um það.

Dómsmálaráðherra segir þetta óboðlegt og vill fjölga þyrluflugmönnum Gæslunnar. Hann bendir á að í fjármálaáætlun sé gerð grein fyrir þörf á að auka fjármagn til Gæslunnar svo hægt sé að fjölga vöktum úr sex í sjö.

„Nei nei, þetta er ekki ásættanleg staða. Svona atvik eiga ekki að koma upp og við munum reyna að beita öllum ráðum til þess að þetta endurtaki sig ekki,“ segir Jón.