Mynd: EPA-EFE - EPA
Athugið þessi frétt er meira en 2 mánaða gömul.
Biden telur Pútín kominn í sjálfheldu varðandi stríðið
Joe Biden Bandaríkjaforseti kveðst uggandi yfir því að Vladimír Pútín forseti Rússlands sé kominn í sjálfheldu með stríðið í Úkraínu. Biden telur hann í basli með að átta sig hvað hann skuli gera næst.
Þetta var meðal þess sem fram kom í ávarpi Bidens í gær á fjáröflunarsamkomu Demókrataflokksins í borginni Potomac í Marylandríki.
Tonight at a closed-door fundraiser, President Biden called President Putin “very calculating” and said he is concerned that the Russian leader can’t find out a way out of the Ukraine war.
— Kaitlan Collins (@kaitlancollins) May 9, 2022
Biden staðhæfði að Pútín hefði talið að innrásin yrði til þess að rjúfa samstöðu ríkja Atlantshafsbandalagsins og Evrópusambandsins. En þvert á móti hafi innrásin orðið til að þétta raðirnar.
Bandaríkjaforseti sagði kollega sinn í Moskvu vera mjög útsmoginn mann sem sæi nú að öll sund væru lokuð í stríðinu. Því sagðist Biden nauðsynlega þurfa að átta sig hvernig bregðast skuli við þeirri stöðu.
Láns- og leiguaðstoð endurvakin
Biden undirritaði í dag lög sem heimila láns- og leiguaðstoð við Úkraínumenn í formi vopna, vista og annars varnings. Bandaríkjamenn brugðust við með svipuðum hætti til stuðnings bandamönnum í baráttunni við öxulveldin í síðari heimsstyrjöld.
Volodymyr Zelensky Úkraínuforseti þakkaði fyrir átakið og kvaðst bjartsýnn á að Úkraína hefði sigur í baráttunni við innrásarher Rússa.
Biden sagði engan tíma mega missa en hann gaf skýrt til kynna að Bandaríkjaþing skyldi samþykkja í skyndi 33 milljarða dala stuðning við Úkraínu til viðbótar því sem þegar hefur verið ákveðið.
