Athugið þessi frétt er meira en 7 mánaða gömul.

Hreiðra má um sig í risarúmi og njóta barnabóka

Risarúm sett upp í Borgarbókasafninu Grófinni á að hvetja til lesturs fyrir börn.
 Mynd: Eyþór Árnason
Risastórt rúm hefur verið sett upp í Borgarbókasafninu í Grófinni. Þar er hægt að leggjast út af, breiða yfir sig stóra sæng og hlusta á eða lesa barnabók. Rúmið er innsetning eftir Svandísi Dóru Einarsdóttur til heiðurs barnabókahöfundum.

Lilja Alfreðsdóttir, menningarmálaráðherra afhjúpaði rúmið á laugardaginn. Hönnuðir verksins, sem heitir Segðu mér sögu, eru þau Tanja Levý og Jökull Jónsson.

Hugmyndin með rúminu stóra er að fullorðnir geti fundið fyrir yndi þess að láta lesa fyrir sig sögur og ljóð líkt og á æskuárum og þannig upplifað sig að nýju sem barn í öryggi rúmsins.

Lilja segir barnabókmenntir mikilvægan þátt í gefandi uppeldi og því hafi áhersla verið lögð á stuðning við útgáfu barnabóka sem hafi skilað sér í fleiri útgefnum bókum.

„Við eigum barnabókahöfundum mikið að þakka fyrir að auðga barnæsku okkar og samfélag. Við þá vil ég segja kærar þakkir,“ segir Lilja.

Tilgangurinn er að hvetja fólk til að taka sér tíma til að lesa fyrir börnin sín og jafnframt til að lesa sjálft bækur. Að því er fram kemur á vef Stjórnarráðsins er verkefnið unnið í samvinnu Menningar- og viðskiptaráðuneytisins og Borgarbókasafns.