Mynd: Landsbjörg
Athugið þessi frétt er meira en 2 mánaða gömul.
Björgunarsveit sótti göngumann í sjálfheldu
Björgunarsveit á Suðurlandi var kölluð út í kvöld þegar tilkynning barst frá göngumanni sem lenti í sjálfheldu í fjöllunum suður af Mýrdalsjökli. Hann hafði verið einn á gangi lengi dags í ágætu veðri en kom sér svo í sjálfheldu í brattlendi í grennd við upptök Deildarár, segir í tilkynningu frá Landsbjörg. Björgunarsveitarmenn fundu manninn laust fyrir klukkan hálftíu.
Í tilkynningu Landsbjargar segir að hann hafi verið óslasaður og í ágætu ásigkomulagi, en nokkuð kaldur. Björgunarsveitarmenn fylgdu honum gangandi niður að sexhjólum sínum og komu honum til byggða.
