Athugið þessi frétt er meira en 2 mánaða gömul.

Lifandi hafnarhverfi við Torfunef á Akureyri

28.04.2022 - 09:03
Mynd með færslu
 Mynd: Arkþing
Lifandi hafnarhverfi við Torfunef á Akureyri og fjölbreytt starfsemi fyrir íbúa og ferðamenn er einkenni vinningstillögu um hönnun svæðisins við gömlu Torfunefsbryggjuna. Arkitektastofan Arkþing/Nordic hlaut fyrstu verðlaun en Arkþing hannaði einnig menningarhúsið Hof.

Helgi Mar Hallgrímsson, arkitekt hjá Arkþingi/Nordic, segir markmiðið hafa verið að búa til aðlaðandi ramma um mannlíf við Akureyrarhöfn og tengja bæinn enn betur við sjóinn.

Mynd með færslu
 Mynd: RÚV - Ágúst Ólafsson
Hönnuðir hjá Arkþingi/Nordic sem áttu verðlaunatillöguna.

Veitingahús, sjósport og fjölnota viðburðatorg

„Við erum að gera ráð fyrir fjölbreyttri starfsemi, veitingahúsum, kaffihúsum, aðstöðu fyrir sjósport, eins og kajak og sjósund,“ segir hann. „Við erum að gera ráð fyrir upplýsingamiðstöð fyrir ferðamenn, aðstöðu fyrir skemmtiferðaskip, og kjarninn í þessu er svona fjölnota viðburðatorg þar sem getur verið ýmislegt. Jólamarkaður, skautasvell, hægt að renna sér á hjólabretti.

Rammi fyrir fjölbreytt mannlíf og menningu

Því sé með tillögunni reynt að búa til ramma fyrir fjölbreytt mannlíf og menningu árið um kring. Ásthildur Sturludóttir, bæjarstjóri á Akureyri, segir að gengið verði til samstarfs við Arkþing/Nordic um frekari hönnun Torfunefssvæðisins og skipulag næstu mánuði.

Mynd með færslu
 Mynd: Arkþing
agusto's picture
Ágúst Ólafsson
Fréttastofa RÚV