Athugið þessi frétt er meira en 4 mánaða gömul.

Enn eykst verðbólgan

28.04.2022 - 10:06
Mynd með færslu
 Mynd: Kristinn Þeyr Magnússon - RÚV
Verðbólgan er komin í 7,2 prósent og hefur farið vaxandi í hverjum mánuði frá því í ágúst. Hún hefur ekki verið meiri frá því í maí árið 2010. Neysluverðsvísitalan sem mælir verðbólgu hækkaði um 1,25 prósent í síðasta mánuði. Það er mesta hækkun í einum mánuði frá því í febrúar árið 2013. Húsnæðiskostnaður, flugfargjöld og verðhækkanir á mat- og drykk, einkum mjólk, ráða mest um aukna verðbólgu.

Hagstofan birti nýja verðbólgumælingu sína í morgun. Samkvæmt þeim hækkaði verð á mat- og drykkjarvörum um 1,4 prósent milli mánaða og stóð hækkandi verð á mjólkurafurðum undir tveimur þriðju hlutum þeirrar hækkunar. Samanlagt hækkaði það neysluverðsvísitöluna um 0,20 prósent. Húsnæðiskostnaður hækkaði um 2,4 prósent og olli 0,45 prósenta hækkun á vísitölunni. Flugfargjöld til útlanda hækkuðu um 22,9 prósent í verði og olli það 0,37 prósenta hækkun á vísitölunni.

Verðbólgan er meiri en spáð var í síðustu þjóðhagsspá Seðlabankans. Hún var hins vegar gerð snemma í febrúar áður en innrás Rússa í Úkraínu olli margvíslegum verðhækkunum á alþjóðamarkaði. Þá gerði Seðlabankinn ráð fyrir 5,8 prósenta verðbólgu á fyrsta fjórðungi þessa árs og 5,6 prósent á öðrum ársfjórðungi. Aðeins er liðinn hálfur mánuður frá því að Landsbankinn spáði því að verðbólga næði hámarki í júní og yrði þá komin í sjö prósent.