Athugið þessi frétt er meira en 2 mánaða gömul.

Óttarr Proppé stýrir hópi um öryggi flóttabarna

Processed with VSCO with a6 preset
 Mynd: hallaharðar  - hallaharðar
Stýrihópur verður stofnaður um rétt og öryggi flóttabarna sem hingað koma, en búist er við að þeim fari fjölgandi. Óttarr Proppé fyrrverandi heilbrigðisráðherra fer fyrir hópnum.

Það er Ásmundur Einar Daðason mennta- og barnamálaráðherra sem þetta ætlar að gera, en hlutverk stýrihópsins verður að vakta stöðu barna sem hingað leita eftir alþjóðlegri vernd til að tryggja réttindi þeirra og velferð. Á heimasíðu stjórnarráðsins segir að á hverju ári komi mörg börn hingað til lands í leit að alþjóðlegri vernd og að gera megi ráð fyrir töluverðri fjölgun þeirra, en stór hluti þeirra sem hingað hafa leitað vegna stríðsins í Úkraínu séu börn. Börn á flótta séu einn viðkvæmasti hópurinn sem fyrirfinnst.

Stýrihópnum er ætlað að veita stjórnvöldum ráðgjöf um viðbrögð, aðstoð og móttöku. Með stofnun hópsins á að tryggja að viðbrögð stjórnvalda séu í samræmi við alþjóðlegar skuldbindingar. Fulltrúar hins opinbera sem að þessum málaflokki koma munu eiga fulltrúa í stýrihópnum sem og fagfólk af vettvangi og fulltrúar félagasamtaka. Óttarr Ólafur Proppé fyrrverandi alþingismaður og heilbrigðisráðherra mun leiða starf stýrihópsins og hefur hann störf 25. apríl næstkomandi.

Þá hefur mennta- og barnamálaráðuneytið gefið út leiðbeiningar til forsjáraðila barna og ungmenna frá Úkraínu um  hvernig hefja skuli skólagöngu hérlendis.

 

holm's picture
Haukur Holm
Fréttastofa RÚV