Athugið þessi frétt er meira en 10 mánaða gömul.

Ghebreyesus: Líf svartra minna metin en hvítra

epa08525471 World Health Organization (WHO) Director-General Tedros Adhanom Ghebreyesus attends a press conference organized by the Geneva Association of United Nations Correspondents (ACANU) amid the COVID-19 pandemic, caused by the novel coronavirus, at the WHO headquarters in Geneva, Switzerland, 03 July 2020.  EPA-EFE/FABRICE COFFRINI
 Mynd: epa
Tedros Adhanom Ghebreyesus, framkvæmdastjóri Alþjóðaheilbrigðismálastofnunarinnar, segir ljóst að heimsbyggðin gefi hörmungum og neyðarástandi mismikinn gaum og vægi eftir húðlit þeirra sem það bitnar á. Einungis brotabrot af þeirri gríðarmiklu neyðaraðstoð sem nú renni til Úkraínu sé veitt til hamfara- og stríðssvæða annars staðar í heiminum, þar sem neyð sé þó óumdeilanlega feikimikil.

Ghebreyesus segir vissulega „afar mikilvægt“ að veita Úkraínu alla þá aðstoð sem hægt er að veita, þar sem stríðið þar hafi „áhrif á heiminn allan.“ En neyðin í Tigray-héraði í Eþíópíu, í Jemen, í Afganistan og Sýrlandi fær ekki sömu athygli, segir Ghebreyesus.

„Ég er ekki viss um að heimsbyggðin gefi lífi svartra og hvítra jafn mikið vægi í raun,“ sagði hann á fréttafundi í gær. „Ég verð að vera afdráttarlaus og og segja það hreint út að heimurinn kemur ekki eins fram við mannkynið allt. Sumir eru jafnari en aðrir. Og það er sársaukafullt að segja þetta. Því að ég sé þetta. Afar erfitt að kyngja þessu, en þetta er að gerast,“ bætti hann við.

Mikil neyð en lítil hjálp

Ghebreyesus, sem er sjálfur frá Tigray-héraði í Eþíópíu, benti á að Sameinuðu þjóðirnar hefðu áætlað að senda þurfi minnst 100 flutningabíla á dag til héraðsins, fulla af nauðsynjum á borð við vatn, mat og sjúkragögn, til að fullnægja brýnustu þörf íbúa. Aðeins lítið brot af þessu berst þó til átakasvæðanna, þar sem þúsundir óbreyttra borgara hafa fallið og milljónir eru á vergangi.

Sameinuðu þjóðirnar hafa líka ítrekað sagt neyð almennings í hinu stríðshrjáða og örfátæka Jemen meiri en nokkurs staðar annars staðar á jarðríki. Þar hafa hátt í 400.000 manns fallið í valinn í stríðsátökum sem staðið hafa linnulítið frá haustinu 2014 og þjóðir heims hafa aldrei farið ýkja nærri því að svara kalli hjálparstofnana Sameinuðu þjóðanna eftir fjárframlögum vegna neyðarinnar þar.

Og í Sýrlandi hefur borgarastyrjöld geisað í ellefu ár. Yfir hálf milljón manna hefur týnt lífinu í stríðinu og milljónir eru enn á flótta, innan og utan Sýrlands. Stríðsglæpir hafa verið og eru enn framdir í öllum þessum styrjöldum, sem allar bitna verst á þeim sem minnst mega sín. 

Ævar Örn Jósepsson
Fréttastofa RÚV