Athugið þessi frétt er meira en 4 mánaða gömul.

Árásir harðna í austurhéruðum Úkraínu

06.04.2022 - 12:37
Refugees return to Ukraine from the border crossing in Medyka, southeastern Poland, Thursday, March 31, 2022. The talks between Ukraine and Russia will resume on Friday as NATO Secretary-General says Russia does not appear to be scaling back its military operations in Ukraine but is instead redeploying forces to the eastern Donbas region. (AP Photo/Sergei Grits)
Þúsundir íbúa í austurhéruðum Úkraínu eru lagðar á flótta. Mynd: AP
Stórsókn rússneska hersins á skotmörk í austurhluta Úkraínu er hafin. Þúsundir eru lagðar á flótta. Nýjustu refsiaðgerðir Evrópusambandsins gegn Rússlandi gengu í gildi í dag. Æðstu stjórnendur sambandsins gera ráð fyrir að þær verði hertar enn frekar.

Rússar hafa látið sprengjum og flugskeytum rigna á borgina Severodonetsk það sem af er degi. Hún er síðasta borgin í austurhluta Úkraínu sem enn er á valdi úkraínska hersins. Bílalest Sameinuðu þjóðanna kom þangað í gær með matvæli og hjálpargögn sem eiga að duga fyrir sautján þúsund manns.

Að sögn fréttamanns AFP eru þúsundir íbúa Donbas-svæðisins á flótta eftir að árásir rússneska hersins voru hertar. Innan þess eru héruðin Donetsk og Luhkansk þar sem aðskilnaðarsinnar hafa lýst yfir sjálfstæði. Héraðsstjórinn í Donetsk áætlar að frá því á sunnudag hafi 146 þúsund héraðsbúar lagt á flótta.

Olía og gas næst?

Nýjustu refsiaðgerðir Evrópusambandsins gegn Rússum vegna fjöldamorða í úkraínska bænum Bucha gengu í gildi í dag. Meðal þeirra er bann við innflutningi á kolum frá Rússlandi. Ursula von der Leyen, forseti framkvæmdastjórnarinnar, sagði, þegar hún gerði Evrópuþinginu grein fyrir aðgerðunum í dag, að verðmæti kolainnflutningsins hafi numið fjórum milljörðum evra á ári, þannig að bannið hefði umtalsverð áhrif á efnahag Rússa. Hún kvaðst gera ráð fyrir að gripið yrði til enn frekari aðgerða.

Charles Michel, forseti leiðtogaráðsins, tók í sama streng, þegar hann ávarpaði þingið. Hann kvaðst búast við að sjónum yrði beint að banni við innflutningi á olíu og gasi fyrr eða síðar.

asgeirt's picture
Ásgeir Tómasson
Fréttastofa RÚV