Athugið þessi frétt er meira en 5 mánaða gömul.

Líkurnar á valdaráni í Kreml sagðar aukast sífellt

epa09695153 Russian President Vladimir Putin attends a meeting with  Iranian President Ebrahim Raisi (not pictured) in the Kremlin  in Moscow, Russia, 19 January 2022.  EPA-EFE/PAVEL BEDNYAKOV / KREMLIN POOL / SPUTNIK MANDATORY CREDIT
 Mynd: EPA-EFE - Sputnik
Líkurnar á að einhver eða einhverjir innan rússnesku leyniþjónustunnar FSB snúist gegn Vladimír Pútín forseta og reyni að ræna hann völdum aukast með hverri vikunni sem innrásin í Úkraínu dregst á langinn. The Guardian greinir frá þessu og vitnar í orð ónefnds háttsetts leyniþjónustumanns máli sínu til stuðnings.

Sá ónefndi uppljóstrari segir mikla upplausn og óánægju hafa grafið um sig innan þjónustunnar í ljósi þess hve illa gangi að ná þeim markmiðum sem Pútín setti sér í upphafi atlögunnar.

Nafnlaus bréf hafa verið birt á netinu skrifuð af greinanda innan leyniþjónustunnar til útlæga andófsmannsins Vladimirs Osechkins stofnanda mannréttindahópsins Gulagu.net.

Osechkin segir í samtali við The Times að áhættusamt sé að skrifa slík bréf en tilskrifin séu augljóst merki um vaxandi reiði í garð Pútíns og óánægju með þau áhrif sem viðskiptaþvinganir vesturlanda hafa á starfsmenn leyniþjónustunnar.

Nú sé útilokað fyrir þá að dvelja í húsunum sínum á Ítalíu eða skreppa með börnin sín í Disneyland.

Osechkin segir að Pútín hafi tekist að koma á stöðugleika í Rússlandi undanfarna tvo áratugi sem hafi tryggt starfsfólki innan ríkiskerfisins, leyniþjónustufólki, lögreglumönnum og saksóknurum gott og öruggt líf.

„Það hefur allt verið hrifsað af þeim og þau vita vel að stríðsreksturinn hefur hörmuleg áhrif á efnahaginn og stöðu mannréttinda. Þau hafa ekki nokkurn minnsta áhuga á að hverfa aftur til tíma Sovétríkjanna,“ segir Osechkin.

„Með hverri vikunni eða mánuðinum sem líður aukast líkurnar á uppreisn gegn forsetanum sífellt.“