Athugið þessi frétt er meira en 3 mánaða gömul.

Snjóþyngsti febrúar í Reykjavík frá aldamótum

03.03.2022 - 13:58
Mynd með færslu
 Mynd: Guðmundur Bergkvist - RÚV
Febrúar var óvenju illviðrasamur þetta árið. Að auki var hann óvenju kaldur og sá snjóþyngsti í Reykjavík frá árinu 2000. Þetta kemur fram í samantekt Veðurstofunnar.

Frá því að mælingar hófust hefur aðeins þrisvar sinnum verið jafn mikill og þrálátur snjór í febrúar í Reykjavík, árin 2000, 1957 og 1925. Alhvítir dagar í borginni voru 24, sem er 12 dögum yfir meðtaltali. Febrúar var einnig snjóþungur á Akureyri en hefur þó oft verið snjóþyngri norðanlands.

„Snjóþyngsli eru alls ekki óþekkt í Reykjavík. Til að mynda var snóþungt í desember 2014, desember 2011 og janúar 2012. Þegar við lítum lengra aftur í tímann má nefna janúar 1993, sem er snjóþyngsti mánuður sem vitað er um í Reykjavík. Einnig voru langir snjókaflar veturinn 1989 og sömuleiðis 1983 og 1984,“ segir í samantekt Veðurstofunnar.

Úrkoma í Reykjavík mældist rúmir 114 millímetrar í febrúar. Það er 27% yfir meðallagi ef horft er til mælinga á árunum 1991-2020. Á Akureyri var úrkoman 98 millimetrar, sem er 88% yfir meðallagi. Aðeins fjórum sinnum hefur mælst meiri úrkoma á Akureyri í febrúar, síðast 2014.

Á fyrstu tveimur mánuðum ársins var úrkoma í Reykjavík 45% meiri en meðalúrkoma á árunum 1991-2020. Á Akureyri mældist hún 23% meiri en áí meðalári.

Sex óveður í febrúar

Febrúar var illviðrasamur og telur Veðurstofan sex óveður í mánuðinum. Verstar voru lægðirnar sem gengu yfir landið 7. og 21. febrúar. Þá voru gefnar út rauðar veðurviðaranir og samgöngur röskuðust verulega um land allt.

Einnig var mjög hvasst dagana 8., 20., 25., og 28. febrúar.

137 veðurviðvaranir

Almannavarnir gáfu út 137 viðvaranir vegna veðurs í febrúar. Í sama mánuði í fyrra voru viðvaranirnar átta. Á yfirlitsmyndinni hér fyrir neðan má sjá að árið 2022 sker sig nokkuð úr.

Tæpum tveimur gráðum kaldara en venjulega

Meðalhiti í Reykjavík var tæpum tveimur gráðum undir meðaltali á árunum 1991-2020 en tæpum þremur gráðum kaldara ef horft er til síðustu tíu ára. Á Akureyri var meðalhitinn í febrúar 2,1 gráðu lægri en árin áður.

Á landsvísu var febrúar sá kaldasti frá 2002.