Athugið þessi frétt er meira en 6 mánaða gömul.

Leghálssýni tekin á Heilsugæslunni send til Danmerkur

Mynd með færslu
 Mynd: Þór Ægisson - RÚV
Sýni tekin í skimunum fyrir leghálskrabbameini verða rannsökuð ýmist á Landspítala eða á rannsóknarstofu Hvidovre-sjúkrahússins í Danmörku, þar til samningur ríkisins við danska sjúkrahúsið rennur út um næstu áramót. Flutningur sýnanna úr landi hefur verið harðlega gagnrýndur af bæði sérfræðingum og þjónustuþegum.

Landspítali byrjaður að rannsaka til móts við Hvidovre

Í byrjun mánaðarins hóf Landspítali formlega greiningar á sýnum sem tekin eru í skimunum við leghálskrabbameini. Aðdragandinn að því að sýnin rati til Landspítala hefur verið langur og gengið á ýmsu, en þegar sýnatökurnar voru færðar frá Leitarstöð Krabbameinsfélagsins yfir til opinbera heilbrigðiskerfisins, biðu konur í allt að sjö mánuði eftir niðurstöðum.

Þá var framkvæmd sýnatökunnar sett í hendur heilsugæslunnar, undir stjórn Samhæfingarmiðstöðvar krabbameinsskimana, og samið við dönsku rannsóknarstofuna um greiningu sýnanna.

Landlæknisembættið vinnur nú að samantekt um þátttöku í leghálsskimunum, en samkvæmt fyrstu niðurstöðum þá dvínaði þátttaka í kjölfar þessa langa biðtíma.

Mótmæltu að sýnin væru send úr landi

Þúsundir kvenna skrifuðu undir áskorun til heilbrigðisráðherra og kröfðust þess að sýnin yrðu rannsökuð hérlendis, sem loks var fallist á, með þeim fyrirvara að geta til greininga á Landspítala kæmist fyrst í góðan farveg.

En Landspítali mun fyrst um sinn aðeins taka við sýnum sem tekin eru hjá kvensjúkdómalæknum, sýnin sem tekin verða á heilsugæslunni verði send til Danmerkur.

Heilsugæslan sendir til Danmerkur um óákveðinn tíma

„Þessar tvær rannsóknarstofur nota mismunandi kerfi til að greina sýnin. Þá þurfum við í rauninni að skipta þessu þannig að hver sýnatökuaðili taki aðeins í eitt kerfi, eins og til dæmis eins og heilsugæslan mun alla vega enn um sinn halda áfram að senda sýnin til Danmerkur“ segir Ágúst Ingi Ágústsson, yfirlæknir Samhæfingarstöðvar krabbameinsskimana.

Tími í leghálsskimun hjá Heilsugæslunni kostar fimm hundruð krónur, en getur kostað allt að níu þúsund krónur hjá kvensjúkdómalækni. Ágúst segist ekki hafa áhyggjur af því að fólk muni síður vilja fara í skimanir á heilsugæsluna, vitandi að sýnin séu rannsökuð erlendis.

„Kerfið er orðið gott eins og það er, við erum komin með ásættanlegan svartíma og fólk getur treyst því að greiningarnar eru alveg jafn góðar hvort sem að sýnin fara til Danmerkur eða á Landspítalann“ segir Ágúst.