Chelsea vann fyrri leikinn, sem spilaður var í síðustu viku, 2-0 og liðið var ekki lengi að koma sér í forystu í kvöld. Það var Antonio Rudiger sem skoraði fyrsta mark leiksins eftir hornspyrnu frá Mason Mount og vandræðagang hjá Pierluigi Gollini í marki Tottenham.

Ekkert gekk hjá Tottenham að jafna þrátt fyrir heiðarlegar tilraunir og rangstætt mark frá Harry Kane sem var dæmt af. Lokatölur 1-0, samanlagt 3-0, og Chelsea komið í úrslitaleikinn þar sem það mætir annað hvort Liverpool eða Arsenal. Það kemur ekki í ljós hver andstæðingurinn verður fyrr en í næstu viku en fresta þurfti viðureign liðanna í síðustu viku vegna Covid-19 smita. Fyrri leikur þeirra verður spilaður á morgun á sá seinni í næstu viku.

Einn leikur fór svo fram í ensku úrvalsdeildinni í kvöld. West Ham og Norwich mættust í London og Jarrod Bowen kom Hömrunum yfir með marki á 42. mínútu, 1-0 í hálfleik. Hann var svo aftur á ferðinni á 83. mínútu þegar hann skoraði annað mark og innsiglaði 2-0 sigur West Ham sem er komið upp í 4. sæti deildarinnar. Norwich situr sem fastast á botninum.