Athugið þessi frétt er meira en 6 mánaða gömul.

Konur sviptar ferðafrelsi í Afganistan

26.12.2021 - 19:46
Mynd með færslu
 Mynd: Jón Björgvinsson - RÚV
Yfirvöld Talíbana í Afganistan hafa gefið út að konur megi ekki fara í langferðir án þess að vera samferða karlmanni. Ef þær ætli sér að ferðast lengra en 72 kílómetra verði þær að vera í fylgd með nákomnum karlkyns ættingja.

Fréttastofa Al Jazeera greinir frá.

Tilskipanin var send til ferðaþjónustu fyrirtækja í landinu, þar sem þeim er bent á að þjónusta ekki konur sem ætli sér að ferðast langa vegalengd án karlkyns ættingja.

Mannréttindi kvenna í ríkinu hafa farið síversnandi eftir valdtöku Talíbana, sem knýja nú fram hverja lagabreytinguna á fætur annarri. Talíbanar hafa komið á fór sérstöku Ráðuneyti dyggða og forvarna gegn löstum, sem gaf einnig út í vikunni að konur mættu ekki nota almenningssamgöngur nema að vera með höfuðslæðu.

Frá valdtökunni hefur konum víða verið meinað að sinna störfum í opinberri stjórnsýslu og konum ekki gefinn kostur á menntun.

Alþjóðlegu samtökin Human Rights Watch segja tilmælin færa konur nær því að vera fangelsaðar á heimilum sínum. „Tilskipanin hreinlega færir konur nær því að vera fangar. Hún sviptir þær ferðafrelsi, frelsi til þess að sinna erindum í öðrum borgum, sinna vinnu eða að forða sér ef þær sæta ofbeldi á heimili sínu“ hefur AFP eftir forstjóra Human Rights Watch.