Athugið þessi frétt er meira en 8 mánaða gömul.

Stefnir í oddvitaslag eftir að Hildur tilkynnti framboð

Mynd: RÚV / RÚV
Hildur Björnsdóttir, borgarfulltrúi Sjálfstæðisflokksins, stefnir á fyrsta sæti í prófkjöri flokksins í Reykjavík fyrir borgarstjórnarkosningar í vor. Hildur skipaði annað sæti á lista Sjálfstæðisflokksins fyrir síðustu borgarstjórnarkosningar. Þá leiddi Eyþór Arnalds listann og hefur hann gefið út að hann gefi kost á sér til þess áfram. Því er útlit fyrir prófkjörsslag um oddvitasætið hjá Sjálfstæðismönnum í Reykjavík.

Hildur tilkynnti um framboð sitt á Facebook-síðu sinni í kvöld. Hún var í viðtali á Stöð 2 og var í viðtali í Kastljósi í kvöld þar sem hún áréttaði þessa fyrirætlan sína.

Dagur B. Eggertsson borgarstjóri var einnig gestur í Kastljósi þar sem þau Hildur tókust á um skuldastöðu og fjármál borgarinnar, málefni leikskóla, starfsmannamál og annað fleira það sem við kemur rekstri borgarinnar.

Hildur segist í framboðstilkynningu vilja skapa höfuðborg sem setji fjölskyldur í forgang með skóla sem mæti fjölbreyttum þörfum og leikskóla sem tryggi inngöngu strax í kjölfar fæðingarorlofs.

Þá vill hún laða að borginni hæfileikafólk með úrvali atvinnutækifæra, lifandi menningu, spennandi búsetukostum og greiðum samgöngum fyrir alla.

Fréttin var uppfærð klukkan 20:54.

Brynjólfur Þór Guðmundsson
Fréttastofa RÚV