Athugið þessi frétt er meira en 1 ára gömul.

Skjálftinn í Grímsvötnum var 3,6 að stærð

06.12.2021 - 09:18
Grímsvötn
 Mynd: Atlantsflug - Ljósmynd
Nokkur skjálftavirkni hefur verið við Grímsfjall nærri Grímsvötnum í Vatnajökli í morgun. Jarðskjálfti, 3,6 að stærð, varð á sjöunda tímanum í morgun og nokkrir eftirskjálftar hafa fylgt í kjölfarið.

Einar Bessi Gestsson náttúruvársérfræðingur segir eftir því sem liðið hefur á morguninn hafi nokkrir eftirskjálftar mælst á svæðinu. Enginn gosórói hefur mælst enn sem komið er. Hlaupið úr Grímsvötnum er í rénun en yfirleitt þegar gos verður eftir hlaup má sjá skýr merki um aukna skjálftavirkni.

„Það hefur verið þannig að það hefur komið skýr skjálftavirkni fram í kringum flóðtoppinn eða dagana í kringum hann og þá hefur verið kröftug skjálftavirkni í einhverjar klukkustundir eða sólarhringa áður en gos hófst en núna erum við bara að horfa á lítillega aukna virkni og fylgjum vel með framhaldinu og sjáum hvert þetta leiðir okkur,“ sagði Einar Bessi í útvarpsfréttum klukkan níu. 

Skjálftinn var fyrst sagður hafa verið 3 að stærð en í uppfærðum upplýsingum Veðurstofunnar kemur fram að hann var 3,6 að stærð. Skömmu áður varð skjálfti af stærðinni 2,3 og stærsti eftirskjálftinn er 2,1 að stærð á rúmlega tveggja kílómetra dýpi tíu kílómetra austur af Hamrinum svokallaða.