Athugið þessi frétt er meira en 2 mánaða gömul.

Óvissustigi aflétt í Geldingadölum en yfirborð óstöðugt

Mynd með færslu
 Mynd: Matthias Vogt - Volcano Heli
Ríkislögreglustjóri, í samráði við lögreglustjórann á Suðurnesjum, hefur ákveðið að aflýsa óvissustigi vegna eldgoss í Geldingadölum. Ekki hefur sést til hraunflæðis frá gígnum frá 18. september.

Þó er varað við því að yfirborðið sé enn óstöðugt og enn sé hætta á gasmengun á svæðinu.

Neyðarstigi var lýst yfir þegar eldgos hófst 19. mars, en það var lækkað í hættustig daginn eftir þar sem ljóst var að eldgosið var fjarri þéttbýli og helstu mannvirkjum. Lækkað var í óvissustig fjórum vikum eftir að síðast sást til elds í Geldingadölum.

Engin merki um kviku á leið upp

Í tilkynningu frá almannavörnum segir að engin merku séu um að grunnstæð kvika sé á ferðinni í Geldingadölum, né að kvika sem liggur dýpra sé að leita upp. Ekki hefur sést til hraunflæðis frá 18. september og jarðskjálftahrinur á svæðinu hafa ekki leitt til frekari atburða.

„Reykjanesskaginn er virkur með tilliti til jarðskjálfa- og eldvirkni og verður áfram fylgst vel með þróun atburða og almannavarnastig reglulega endurmetin,“ segir í tilkynningu.

Enn getur gas safnast saman

Þó er sérstaklega vakin athygli á því að varhugavert getur verið að fara inn á hraunbreiðuna við Geldingadali og að gígum á svæðinu, því töluverðan tíma getur tekið fyrir hraun að kólna og ennþá er yfirborð og gígar óstöðugir. Hrun getur því orðið eða sprungur myndast. 

Auk þess má búast við gasmengun á svæðinu, því afgösun hraunsins getur haldið áfram um einhvern tíma og hættulegar aðstæður myndast þar sem gas getur safnast saman.