Athugið þessi frétt er meira en 7 mánaða gömul.

Sendiherra kallaður á fund vegna ummæla Abe um Taívan

02.12.2021 - 05:14
epa08421487 Japan's Prime Minister Shinzo Abe speaks during a news conference in Tokyo, Japan, 14 May 2020, about the country's state of emergency over the coronavirus disease (COVID-19) pandemic.  EPA-EFE/AKIO KON / POOL
 Mynd: EPA-EFE - BLOOMBERG POOL
Utanríkisráðuneyti Kína kallaði Hideo Tarumi sendiherra Japans í landinu á sinn fund í gærkvöldi vegna ummæla sem Senso Abe fyrrverandi forsætisráðherra lét falla varðandi stöðu Taívans.

Abe sagði  á stafrænum fundi taívansks sérfræðingahóps í gær að þær ógnir sem beindust að Taívan ættu sömuleiðis við Japan. Hann kvaðst því vara Xi Jinping forseta Kína við því að allir hernaðartilburðir í garð Taívan væru skref í átt að fjárhagslegu sjálfsvígi.

Það segir utanríkisráðuneyti Kína vera ruddaleg afskipti af innanríkismálum ríkisins og því var japanski sendiherrann boðaður á fund. Allt frá því að Tsai Ing-wen var kjörin forseti Taívan hafa Kínverjar aukið þrýstíng sinn en hún hafnar alfarið þeirri kenningu að landið sé hluti Kína. 

Aukin umsvif Kínverja í lofthelgi Taívan undanfarna mánuði hafa vakið ugg í brjóstum bandamanna þeirra, Japans og Bandaríkjanna þar með talinna. Ótti um að Kínverjar hyggi á innrás í Taívan eykst þótt ekki sé talið líklegt að þeir láti til skarar skríða alveg á næstunni.

Fyrr í vikunni kynnti bandaríska varnarmálaráðuneytið áætlanir um aukinn hernaðarviðbúnað á Guam og í Ástralíu. Japanir hafa sömuleiðis mótmælt auknum umsvifum Kínverja á svæðinu hástöfum, ekki síst í tengslum við umdeildar eyjar í Suður-Kínahafi.

Hua Chunying aðstoðarutanríkisráðherra Kína rifjaði upp fyrri tíma hernaðaraðgerðir Japana gegn Kínverjum og sagði þá ekki hafa nokkurn rétt eða vald til að tjá sig um málefni Taívan.