Athugið þessi frétt er meira en 6 mánaða gömul.

Omicron-afbrigðið kemst líklega framhjá ónæmisvörnum

26.11.2021 - 19:37
epa09605433 Travelers receive information at a Covid-19 testing center at the departure area of the International Airport in Duesseldorf, Germany, 26 November 2021. The spread of a potentially more dangerous variant of coronavirus in southern Africa has caused international concern. Experts fear that the heavily-mutated B.1.1.529 Coronavirus variant could be highly contagious - because of its unusually large number of mutations - and that could also penetrate the protective shield of vaccines more easily. The German government is restricting air travel with South Africa as a result.  EPA-EFE/SASCHA STEINBACH
 Mynd: EPA
Nýtt Omicron-afbrigði COVID-19, sem greindist fyrst í Suður-Afríku, er líklega meira smitandi og kemst fram hjá ónæmisvörnum, að mati vísindamanna.

Það hefur greinst í Evrópu. Evrópusambandið hefur bannað ferðalög þangað frá sunnanverðri Afríku þar til áhrif afbrigðisins verða ljós.

Mikil fjölgun smita

Aðal veirufræðingur Suður-Afríku tilkynnti opinberlega um nýja afbrigðið í gær en það er talið standa undir mikilli fjölgun daglegra smita undanfarna daga.

Aðeins fjörutíu og tvö prósent íbúa Suður-Afríku eru fullbólusettir og því óttast vísindamenn áfram hraða útbreiðslu. 

Fleiri stökkbreytingar

Stökkbreytingarnar í þessu afbrigði eru tvöfalt fleiri en í delta afbrigðinu.  „Gögnin sýna að stökkbreytingarnar geri afbrigðið meira smitandi og mögulega að mótefni virki síður gegn því,“ sagði Susan Hopkins, aðalráðgjafi heilbrigðisöryggisstofnunar Bretlands.

Tekið er þó fram að frekari rannsókna sé þörf. Evrópusambandið brást skjótt við. „Framkvæmdastjórn Evrópusambandsins hefur lagt til við aðildarríki að stíga á neyðarhemilinn og takmarka ferðalög frá sunnanverðri Afríku til að hefta útbreiðslu afbrigðisins,“ sagði Ursula von der Leyen, forseti framkvæmdastjórnarinnar.

Flug bannað

Það þýðir að allt flug verði bannað til Evrópu frá Suður-Afríku, Namibíu, Botsvana, Simbabve, Lesótó og Esvatíní, sem hét áður Svasíland. 

Stór hluti Evrópulanda hefur þegar ákveðið að fylgja þessu, og við það eru margir ósáttir.

„Þetta er heimsálfa sem reiðir sig á ferðamennsku og nú eru Boris Johnson og ríkisstjórn hans, og önnur Vesturlönd, að setja takmarkanir á þetta svæði. Mér finnst það ekkert sérstaklega sanngjarnt,“ sagði Callum Perry, Breti búsettur í Suður-Afríku.

Þessar aðgerðir gætu líka komið of seint. Í dag var tilkynnt að afbrigðið hefði greinst í Belgíu fyrir fjórum dögum. Það hefur því þegar borist til Evrópu.
Það tekur nokkrar vikur fyrir vísindamenn að sjá hver áhrifin af þessu nýja afbrigði verða í raun og veru, til dæmis á bólusetningar.

Bóluefnaframleiðandinn Pfizer hyggst gefa sér tvær vikur til að rannsaka hvort bóluefni fyrirtækisins veiti vörn gegn þessu nýja afbrigði.

Ótímabært að grípa til aðgerða

Þórólfur Guðnason sóttvarnalæknir segir ekki tímabært að grípa til aðgerða hérlendis vegna nýs afbrigðis kórónuveirunnar. Hann vonar að full bólusetning dugi ekki síður á þetta afbrigði en delta afbrigðið. 

„Auðvitað erum við alltaf að fylgjast með nýjum afbrigðum, því að það er það sem við höfum verið að tala um, hvort það gætu komið ný afbrigði sem bóluefni geti ekki verndað gegn og þetta gæti verið eitt af því en það eru bara svo, vantar svo mikið af upplýsingum enn þá að ég held að við þurfum bara að taka því rólega,“ segir Þórólfur.

Koma verði í ljós hvort þörf sé á því að herða takmarkanir á landamærunum.

hallgrimur's picture
Hallgrímur Indriðason
Fréttastofa RÚV