MeToo hreyfingin á undir högg að sækja í Kína

20.11.2021 - 04:15
epa09591035 People walk on the street next to the large screen showing the newest stock exchange data in Shanghai, China, 19 November 2021. Over the past three weeks, nine stocks ended below their Shenzhen and Shanghai Stock Exchange offer prices. The vaccine maker Liaoning Chengda Biotechnology had the worst stock crash by 27 percent.  EPA-EFE/ALEX PLAVEVSKI
 Mynd: EPA-EFE - EPA
MeToo hreyfingin í Kína hefur mátt þola mikla ritskoðun en réttarkerfið þar í landi leggur þungar byrðar á þolendur kynferðisbrota. Femínistar eru ofsóttir og fangelsaðir.

Það var ekki fyrr en tenniskonan Peng Shuai sagði fyrr­ver­andi vara­for­seta landsins hafa nauðgað sér að slíkar ásakanir á hendur æðstu manna komu fram í dagsljósið. Síðan hefur ekkert til hennar spurst.

Bandaríkjastjórn og Sameinuðu þjóðirnar krefja Kínastjórn um sönnur fyrir því að Peng sé heil á húfi. Eins vilja þau fá staðfestingu á því hvar hún sé niðurkomin.

Aðrar konur hafa mátt þola sömu örlög enda tekur Kínastjórn hart á öllum tilraunum til andófs. Algengt er að femínistar sem hafa sig mikið í frammi séu ofsóttir eða fangelsaðir.

Andófskonan Sophia Huang Xueqin var handtekin í september ásökuð um undirróður gegn ríkinu að samkvæmt upplýsingum samtakanna Fréttamenn án landamæra. Á síðasta ári voru sett ný lög þar sem kynferðisbrot voru skilgreind en það hefur litlu breytt.

Fátítt er að kynferðisbrotamál nái inn í réttarsali og enn sjaldgæfara að dómar falli gegn brotamönnum. Hins vegar hafa brotaþolar mátt þola ófrægingu í kjölfarið.

AFP-fréttaveitan hefur eftir ónefndri heimildakonu að konur sem kæra þurfi alltaf að sanna heiðarleika sinn og að ætlun þeirra sé ekki að lyfta sér á stall. 

Árið 2018 lokuðu stjórnvöld fyrir margvísleg myllumerki og tiltekin orð eftir að fjöldi kvenna ásakaði háskólaprófessora um kynferðisáreitni.

Enn er ekki hægt að nota myllumerkið MeToo í Kína. Þrátt fyrir að Xi Jinping forseti segi konur vera mikilvægan hlekk í starfsemi ríkisins eru þær harla fáséðar í lykilstöðum.