Athugið þessi frétt er meira en 6 mánaða gömul.

Bannon gaf sig fram við alríkislögreglu

epa09583531 Trump ally and former White House adviser Steve Bannon (C) arrives to turn himself into authorities at the FBI Field Office in Washington, DC, USA, 15 November 2021. Bannon surrendered to authorities after being indicted on two counts of contempt of Congress for defying the Jan. 6 committee request for documents and testimony related to the riot at the Capitol.  EPA-EFE/PETE MAROVICH
 Mynd: EPA
Steve Bannon, ráðgjafi Bandaríkjaforseta í forsetatíð Donalds Trump, hefur gefið sig fram við bandarísku alríkislögregluna í Washington.

Sagður lítilsvirða þingið

Dómsmálaráðuneytið ákærði Bannon fyrir að sýna Bandaríkjaþingi lítilsvirðingu á dögunum eftir að hann neitaði að bera vitni um árás stuðningsmanna Trumps á þinghúsið 6. janúar og neitaði að afhenda skjöl sem beðið var um.

Allt að ársfangelsisdómur og 13 milljóna króna sekt bíður Bannons, sem var áður forstjóri öfgahægrimiðilsins Breitbart. Hann stýrir nú hlaðvarpinu War Room og í þætti sem birtur var degi fyrir árásina á þinghúsið varaði hann við því að „fjandinn yrði laus“ degi síðar. 

„Við vinnum að niðurrifi Biden-stjórnarinnar á hverjum einasta degi,“ sagði Bannon við stuðningsmenn á leið sinni inn á skrifstofur alríkislögreglunnar í dag.

Segist njóta friðhelgi

Að mati lögfræðinga Bannons þarf hann ekki að upplýsa um samskipti sín við forsetans á grundvelli reglna um friðhelgi framkvæmdavaldsins. Trump hefur sjálfur hvatt fyrrverandi aðstoðarmenn sína og ráðgjafa til að hafna því að bera vitni á þessum sömu forsendum.

Þórgnýr Einar Albertsson