Athugið þessi frétt er meira en 3 mánaða gömul.

Gasdæling frá Rússlandi með óbreyttu sniði

12.11.2021 - 12:01
epa02415098 View of the natural gas dewatering facility of the Gas Transmission Operator Gaz-System SA in Mackowice, Poland, 27 October 2010. Poland's pipeline operator Gaz-System SA said on October 26 it signed a deal to take over the management of the Yamal natural gas pipeline from EuRoPol Gaz SA, a joint venture of OAO Gazprom of Russia and Poland's Polskie Gornictwo Naftowe i Gazownictwo SA.  EPA/DAREK DELMANOWICZ POLAND OUT
Yamal-Europe gasleiðslan milli Rússlands og Póllands liggur um Hvíta-Rússland. Mynd: EPA - PAP
Talsmaður rússnesku ríkisstjórnarinnar segir að Rússar ætli að standa við samninga um gasviðskipti við aðrar Evrópuþjóðir. Forseti Hvíta-Rússlands hótaði í gær að skrúfa fyrir gas frá Rússlandi ef Evrópusambandið herðir refsiaðgerðir gegn landi hans.

Dmitry Peskov, talsmaður rússnesku stjórnarinnar, sagði í dag á fundi með fréttamönnum að Rússar hefðu staðið við samninga um sölu á gasi til evrópskra neytenda og ætli að gera það áfram. Hann sagði að Alexander Lukashenko, forseti Hvíta-Rússlands, hefði ekki borið hótun sína um að skrúfa fyrir gasið undir stjórnvöld í Kreml áður en hann lét hana falla. Yamal-Europe gasleiðslan liggur um Hvíta-Rússland.

Evrópusambandið sakar Lukashenko og stjórn hans um að standa að baki því að þúsundir hælisleitenda hafi að undanförnu reynt að komast frá Hvíta-Rússlandi til Póllands. Þetta er sagt vera gert í hefndarskyni fyrir efnahagslegar refsiaðgerðir sem stjórn hans er beitt. Til greina kemur að herða þær í næstu viku.

Fulltrúar Bandaríkjanna og fimm Evrópuríkja í öryggisráði Sameinuðu þjóðanna fordæmdu í gær þær aðgerðir Hvít-Rússa að flytja þúsundir hælisleitenda frá Miðausturlöndum að landamærum Póllands. Fjórtán þúsund pólskir hermenn og lögreglumenn varna því að fólk komist yfir landamærin.

Evrópusambandið hefur farið þess á leit við á annan tug þjóða að komið verði í veg fyrir að hælisleitendur verði fluttir til Hvíta-Rússlands.

Ríkisflugfélag Hvíta-Rússlands tilkynnti í morgun að Sýrlendingar, Írakar og Jemenar fái ekki að koma til landsins í flugi frá Tyrklandi. Þetta er gert að beiðni tyrkneskra stjórnvalda að sögn AFP-fréttastofunnar.