Athugið þessi frétt er meira en 9 mánaða gömul.

Kolsvört skýrsla um stjórnarhætti á Menntamálastofnun

Mynd með færslu
 Mynd: RÚV
Allir áhættuþættir sem snerta stjórnun Menntamálastofnunar eru merktir rauðir í áhættumati sem unnið var fyrir menntamálaráðuneytið, sem er til marks um alvarleg vandamál sem krefjast skjótra viðbragða. Alvarleg veikindi í hópi starfsfólks eru rakin til óstjórnar forstjórans, sem meirihluti starfsfólksins vantreystir. Þetta kemur fram í skýrslu mannauðsfyrirtækisins Auðnast, sem vann áhættumatið. Fréttablaðið greinir frá.

Stjórnunarhættir sem ógna öryggi og heilsu starfsfólks

Samkvæmt bráðabirgðaniðurstöðum, sem Fréttablaðið hefur í sínum fórum, eru sjö af ellefu áhættuþáttum sem skoðaðir eru merktir rauðir, þar á meðal allir áhættuþættir sem viðkoma stjórnun. Rauði liturinn táknar óviðunandi áhættu, sem nauðsynlegt er að bregðast við án tafar.

Fram kemur að þeir stjórnunarhættir sem viðhafðir eru hafi „skapað óæskilegan starfsanda sem ógnar öryggi og heilsu starfsfólks.“

Ofbeldi, kynferðisleg áreitni og einelti

Helmingur starfsfólks telur sig hafa orðið fyrir eða orðið vitni að einelti, kynferðislegri og/eða kynbundinni áreitni eða ofbeldi á vinnustað. Dæmi eru sögð um „alvarlegar afleiðingar [stjórnunarhátta] á sjálfsmynd og lífsánægju starfsfólks.“

Útbreitt vantraust á forstjóranum

Viðtöl við starfsfólk leiði enn fremur í ljós, að meirihluti þess vantreystir forstjóranum, Arnóri Guðmundssyni. Þá herma heimildir Fréttablaðsins að þrír starfsmenn hafi sagt upp störfum „vegna þess sem þeir lýsa sem stjórnunarvanda, stefnuleysi, hentileikastefnu, skorti á yfirsýn yfir verkefni og fjármál og eineltistilburðum forstjórans.“