Athugið þessi frétt er meira en 3 mánaða gömul.

Eurovision-mynd Hatara aftur á hvíta tjaldið

Mynd með færslu
 Mynd: Tattarrattat - RÚV

Eurovision-mynd Hatara aftur á hvíta tjaldið

29.10.2021 - 10:31

Höfundar

A Song Called Hate, eða Lagið um hatrið, heimildarmyndin sem fjallar um Eurovision ævintýri Hatara verður sýnd á hátíðarsýningu í Bíó Paradís 7. nóvember til styrktar Sabreen, menningarsamtaka í Palestínu.

Heimildarmyndin verður sýnd á hátíðlegri styrktarsýningu sunnudaginn 7. nóvember klukkan 20 í Bíó Paradís. Allur ágóði sýningarinnar rennur óskiptur til Sabreen, menningarsamtaka sem reka hljóðver í Sheikh Jarrah hverfinu í Austur-Jerúsalem. Markmið Sabreen er að stuðla að óheftri tónlistarsköpun og tónlistaruppeldi Palestínumanna. 

Eftir að kórónuveirufaraldurinn skall á hefur fjárhagsstaða samtakanna verið tvísýn. Auk þess hafa takmarkanir sem hamla samstarfi á milli Palestínumanna í Jerúsalem, Vesturbakkanum og Gaza gert samtökunum erfitt um vik.

Í ferð sinni til Ísrael og Palestínu kynntust meðlimir Hatara fjölmörgum í gegnum Sabreen-stúdíóið. „Við kynntumst mikið af listafólki í gegnum Sabreen-stúdíóið sem við heimsóttum við gerð myndarinnar. Þarna er unnið magnað starf sem veitir ungum listamönnum tækifæri til að stíga sín fyrstu skref. Það er pabbi Bashar, Said Murad, sem leiðir þetta starf. Stuðningur hans við frumlegar og róttækar hugmyndir er ómetanlegur,” segir Anna Hildur Hildibrandsdóttir leikstjóri myndarinnar.

Í myndinni má meðal annars fylgjast með samstarfi Hatara, Bashar Murad og forsvarsfólks Trashy Clothing í Palestínu og þar sést hversu flókið slíkt samstarf getur verið í þeim aðstæðum sem Palestínumenn búa við. 

Undir þetta taka þeir Matthías Tryggvi Haraldsson og Klemens Hannigan Nikulásson, meðlimir Hatara. „Fréttir frá Sheikh Jarrah hafa verið átakanlegar og Bashar hefur verið í miðri hringiðunni allan tímann. Við fögnum því að heimildarmyndin leggi Sabreen-samtökunum lið með svona bíósýningu“ segir Matthías. „Sabreen kemur óbeint við sögu í myndinni. Þótt það sé ekki aðalatriðið eiga þessi samtök stóran hluta í okkar huga og þarna skildum við betur tilganginn með vegferð okkar,“ bætir Klemens við. 

Lagið um hatrið hefur farið sigurför um heiminn síðan að myndin var frumsýnd árið 2020. Hún hefur verið sýnd á yfir tuttugu alþjóðlegum hátíðum og var valin heimildarmynd ársins á Eddunni.