Víkingur gæti orðið fimmta félagið til að vinna tvennu

Mynd með færslu
 Mynd: Mummi Lú

Víkingur gæti orðið fimmta félagið til að vinna tvennu

14.10.2021 - 14:10
Víkingur R. og ÍA eigast við í úrslitum Mjólkurbikars karla á Laugardalsvelli á laugardag. Vinni Víkingur kemst liðið í fámennan hóp þeirra félaga sem tekist hefur að verða Íslands- og bikarmeistari karla í fótbolta á sama árinu.

Mótherjar Víkings á laugardag hefur unnið þetta afrek fjórum sinnum. Fyrst 1983 og svo aftur 1984, 1993 og 1996. KR hefur jafn oft unnið Íslandsmótið og bikarkeppnina sama árið og gerði það raunar fyrst liða. KR vann sínar tvennur 1961, 1963, 1999 og svo 2011. KR er jafnframt síðasta liðið til að vinna tvennuna á Íslandi.

Að auki hafa svo Valur (1976) og ÍBV (1998) tekist að vinna báða titla á einu og sama tímabilinu. Víkingur gæti því með sigri á ÍA í bikarúrslitunum á laugardag orðið fimmta félagið sem vinnur tvennuna, þar sem Víkingur varð á dögunum Íslandsmeistari.

Skagamenn kláruðu Íslandsmótið hins vegar með stæl og unnu þrjá síðustu deildarleiki sína. Þeir koma því borubrattir inn í úrslitaleikinn og ætla sér vitanlega ekkert annað en bikarinn og tryggja sér um leið Evrópusæti. Bikarúrslitaleikur ÍA og Víkings hefst klukkan 15:00 á Laugardalsvelli á laugardag og hefur miðasala gengið vel hjá báðum félögum.