Ein besta sinfóníusveit heims með tónleika í Eldborg

Concertgebouw hljómsveitin, sem er ein af bestu og virtustu sinfóníhljómsveita heims, kemur fram í Eldborg í Hörpu þann 10. nóvember næstkomandi. Er þetta í fyrsta sinn sem hljómsveitin kemur til Íslands en stjórnandi á tónleikunum er hinn bráðungi og eftirsótti hljómsveitarstjóri, Klaus Mäkelä.
 Mynd: Anne Dokter - Royal Concertgebouw Orchestra

Ein besta sinfóníusveit heims með tónleika í Eldborg

13.10.2021 - 10:02

Höfundar

Hin heimsfræga Concertgebouw hljómsveit kemur fram á tónleikum í Eldborg í tilefni af tíu ára afmæli Hörpu

Concertgebouw hljómsveitin, sem er meðal bestu og virtustu sinfóníuhljómsveita heims, kemur fram í Eldborg í Hörpu 10. nóvember. Er þetta í fyrsta sinn sem hljómsveitin kemur til Íslands en stjórnandi á tónleikunum er hinn bráðungi og eftirsótti hljómsveitarstjóri, Klaus Mäkelä.

Í tilkynningu frá Hörpu segir að tónleikar sveitarinnar í Eldborg verði viðburður á heimsmælikvarða sem örsjaldan býðst að upplifa á Íslandi. Á efnisskránni eru sjötta sinfónía Dímítríj Shostakovitsj og sjötta sinfónía Pjotr Tsjajkovskíj, með undirtitilinn „Pathétique“.

Tónleikarnir eru einn af hápunktum ársins í stórafmælisdagskrá Hörpu. Miðasala hefst föstudaginn 15.október kl. 12.

„Það hefur verið draumur beggja aðila að koma á tónleikum með þessari stórkostlegu hljómsveit í Hörpu, enda húsið byggt til að geta tekið á móti bestu listamönnum í heimi,“  segir Svanhildur Konráðsdóttir forstjóri Hörpu. „Þessi draumur er nú að rætast á þessu óvenjulega afmælisári hússins. Aðeins verður um eina tónleika að ræða. Þetta einstaka tækifæri í samstarfi Hörpu og hljómsveitarinnar bauðst núna og vart hægt að hugsa sér glæsilegra innlegg í upprisu menningar- og listalífsins á Íslandi.“

Concertgebouw hljómsveitin þykir skara fram úr fyrir silkimjúkan hljóm, mikla dýnamíska breidd og blæbrigðaríka og næma túlkun. Hljómsveitin var stofnuð árið 1888 og á heimili sitt í tónlistarhúsinu Concertgebouw, í miðborg Amsterdam.

Klaus Mäkelä er einn eftirsóttasti hljómsveitarstjóri heims, aðeins 25 ára gamall. Hann hefur starfað sem aðalhljómsveitarstjóri Fílharmóníuhljómsveitarinnar í Ósló frá 2020 og verður auk þess aðalhljómsveitarstjóri Orchestre de Paris frá haustinu 2022.