Athugið þessi frétt er meira en 2 mánaða gömul.

Rýmingu aflétt að hluta

05.10.2021 - 15:16
default
 Mynd: RÚV - Sölvi Andrason
Á fundi Almannavarna var ákveðið að aflétta rýmingu á syðra svæði rýmingarinnar í Kinn, frá og með Ófeigsstöðum og Rangá í norðri að Hrafnsstöðum í suðri. Enn hefur rýmingu ekki verið aflétt í Útkinn.

Óvissustigi aflétt á Tröllaskaga

Almannavarnir hafa ákveðið að aflétta óvissustigi á Tröllaskaga.

Í Þingeyjarsveit hefur að mati sérfræðinga á Veðurstofu Íslands dregið verulega úr skriðuhættu á syðra svæðinu í Kinninni og ástandið þar orðið skaplegt. Minna vatn sé í hlíðum þrátt fyrir rigninguna í gær og engar skriður fallið þarna í hrinunni. Skriðuhætta sé því talin vera orðin lítil.  Á ytra svæðinu norðan við Ófeigsstaði og Rangá í Útkinn hefur ástandið líka lagast, segir í tilkynningu frá almannavörnum. Ekki hefur frést af neinum skriðuföllum í rúman sólarhring. Lækir eru enn í skriðusárum en þeir hafa minnkað. Skriðuhætta er talin hafa minnkað mikið en þó þykir ástæða til að fylgjast með stöðunni fram eftir degi áður en rýmingu verður aflétt á nyrðra svæðinu.

Vegurinn um Kinn hefur verið opnaður fyrir almennri umferð og stefnir Vegagerðin að því að ryðja aur af vegi í Útkinn í dag þannig að mjólkubíll komist til að sækja þangað mjólk eftir mjaltir í fyrramálið. Síðdegis verður haldinn stöðufundur með Veðurstofu Íslands og kannað hvort öruggt verði að aflétta rýmingu í Útkinn.

Veðurspáin gerir ráð fyrir austanhvassviðri á fimmtudag og þá gæti rignt hressilega, sérstaklega á nyrðra svæðinu. Viðbragðsaðilar munu áfram fylgjast með veðurspánni og taka afstöðu til þess hvaða áhrif hún hefur á skriðuhættu.