Hjón fundust látin í Kolbotn í Noregi

22.09.2021 - 07:00
epa02843441 A police line cordons off the area after parts of Oslo main railway station, Oslo S, were closed and evacuated early on 27 July 2011 after a suitcase with no apparent owner was discovered on one of the platforms. Bomb disposal experts have
 Mynd: EPA - Scanpix Norway
Rannsókn er hafin á andláti hjóna í Kolbotni í Noregi. Lögregla fékk tilkynningu um alvarlegt ofbeldi í íbúðarhúsi á öðrum tímanum í nótt að norskum tíma. Þegar lögreglumenn komu á vettvang voru maðurinn og konan bæði látin.

Í fréttatilkynningu lögreglunnar er tekið fram að þau hafi bæði verið með mikla áverka. Að sögn fréttastofu norska ríkisútvarpsins vill lögreglan ekkert segja til um hvort einhver utanaðkomandi hafi átt sök á láti hjónanna. Ekki var greint frá dánarorsök eða hvort, og þá hvaða, vopni var beitt. Tækni- og rannsóknardeild lögreglunnar er á vettvangi og verður eitthvað frameftir degi.
 

Róbert Jóhannsson
Fréttastofa RÚV