„Virðist vera eldgos sama hvar maður er“

19.09.2021 - 16:10
epa09476469 Smoke rises to the sky from the volcanic eruption in El Paso, La Palma, Canary islands, Spain, 19 September 2021. The area registered hundreds of small earthquakes along the week as magma pressed the subsoil on its way out. Regional authorities started to evacuate locals with mobility issues hours before the eruption took place.  EPA-EFE/Miguel Calero
 Mynd: EPA
Eldgos hófst á La Palma eyju á Kanaríeyjum á fjórða tímanum í dag í eldfjallinu Rajada. Mikil spenging varð áður en gosmökkur reis upp úr fjallinu en töluverð skjálftavirkni hafði verið í kringum það frá 11. september. Þórarinn Einarsson er í fríi á eynni og fylgist nú með gosinu. Hann segir að hættan virðist vera meiri af skógareldum en hrauni að svo stöddu.

 „Ég sé elda sem eru mjög nálægt húsaþyrpingum þannig að það er örugglega ekkert langt í það að einhver hús verði skógareldum að bráð. Ég sé ennþá allavega ekki neitt hraunrennsli,“ segir hann.

„Það voru skógareldar hérna í fyrra sem ollu talsverðum skemmdum þannig að ég hugsa að fólk muni fyrst óttast þá,“ segir Þórarinn.

Hann hefur verið á eynni í um tvær vikur og gistir í bústað norðan við gosið. Þegar hann heyrði í spænskum fjölmiðlum að gos væri hafið dreif hann sig upp á fjall í grennd við bústaðinn þar sem hann sá gosmökkinn og heyrði sírenuvæl og drunur.

Er þetta ógnvekjandi?
„Ég er allavega ekki að skjálfa neitt þegar ég horfi á þetta en engu að síður var smæð eyjunnar, óvissan og alls konar svör nokkuð ógnvekjandi fyrir, en ég er að minnsta kosti alveg rólegur horfandi á þetta núna,“ segir Þórarinn.

Hann segir að hann hafi ekki fengið fyrirmæli um að rýma þurfi hverfið sem hann gistir í. „Ég held að ég verði um kyrrt en ég á svo sem bókað flug núna á fimmtudaginn og er ekkert bjartsýnn að af því verði. 

Þetta er væntanlega ekki það sem þú bjóst við þegar þú fórst í fríið?
„Nei, ég átti nú alls ekki von á þessu en það virðist bara vera eldgos sama hvar maður er,“ segir Þórarinn.