Athugið þessi frétt er meira en 1 mánaða gömul.

Angjelin segir morðið hafa verið örþrifaráð

Mynd með færslu
 Mynd: Freyr Gígja Gunnarsson - RÚV
Verjandi Angjelin Sterkaj, sem hefur einn játað sök í Rauðagerðismálinu, krefst þess í greinargerð til Héraðsdóms Reykjavíkur að hann verði ekki dæmdur til refsingar fyrir að hafa orðið Armando Beqiri að bana með því að skjóta hann níu sinnum. Morðið hafi verið örþrifaráð föður sem hafi verið hótað lífláti af mönnum sem lögregla telji að tengist skipulagðri glæpastarfsemi. Hótanir þeirra hafi beinst bæði að honum og syni hans.

Fréttastofa óskaði eftir þessum greinargerðum um leið og þær voru lagðar fram. Tafir urðu á því að verjendur samþykktu að þær yrðu afhentar, dómari rak á eftir því í réttarhaldinu í vikunni og þær bárust loks í dag. 

Taldi sér ógnað af glæpamönnum

Angjelin Sterkaj gaf skýrslu fyrir dómi á mánudag. Þótt skýrslutakan hafi staðið í nærri þrjár klukkustundir gefur greinargerðin mun skýrari mynd af vörn hans.

Þar rekur hann meðal annars að Armando og félagi hans hafi hótað honum öllu illu ef hann aðstoðaði þá ekki við að rukka Íslendinginn, sem sat um tíma í gæsluvarðhaldi vegna málsins, um 10 milljónir króna.   

Íslendingurinn gaf skýrslu fyrir héraðsdómi í vikunni og kannaðist ekki við að hafa átt í útistöðum við Armando og þaðan af síður að Armando og félagi hans hafi ætlað að innheimta einhverja sekt.

Íslendingurinn hefur verið sagður umsvifamikill í undirheimum. Í byrjun árs var gögnum úr viðkvæmri rannsókn lekið á netið sem bentu til þess að hann hefði verið upplýsingagjafi lögreglu. 

Minnisbók með skuldum og gróft ofbeldi í dyravarðadeilu

Verjandi Angjelin segir í greinargerðinni að skjólstæðingur hans hafi keypt sér byssu sem hann hafi kappkostað við að hafa á sér öllum stundum. Þetta hafi hann gert til að allir sæju til þess að „þessum glæpamönnum stæði ógn af honum.“ Lögregla hafi vitað að hann bæri þessa byssu en ekkert gert. Telur verjandinn þetta sýna að hún hafi talið að Angjelin myndi ekki beita henni.

Í greinargerðin er síðan vitnað til ummæla Margeirs Sveinssonar á blaðamannafundi í mars þar sem hann var spurður hvort hann teldi að Armando tengdist skipulagðri glæpastarfsemi.   Margeir sagði á fundinum að hann teldi svo vera en þegar hann kom fyrir héraðsdóm í vikunni neitaði hann að svara frekari spurningum um það mál til að vernda rannsóknarhagsmuni. 

Verjandi Angjelin segir engu að síður að gögn málsins styðji tengsl Armando við skipulögð glæpasamtök. Til að mynda hafi fundist svört minnisbök á heimili hans þar sem finna mátti skuldalista og þá séu til gögn um að hann hafi verið að selja fíkniefni. 

Í greinargerðinni er jafnframt vitnað til ummæla ekkju Armando um að hún hafi orðið vör við deilur milli hópa í dyravarðastarfsemi en Armando rak dyravarðafyrirtæki. Hún hafi meðal annars lýst „grófu ofbeldi“ sem hafi átt sér stað í tengslum við þær deilur.

Verjandinn segir Angjelin hafa þekkt þankagang Armando og samverkamanna hans sem hafi hótað að drepa hann og son hans. Hann hafi talið þessa menn hættulega og gögn málsins bendi til þess að þetta hafi ekki verið einhver vænisýki hjá honum. 

Hélt að þeir ætluðu að drepa sig og son sinn

Verjandinn segir að Angjelin hafi ætlað að reyna að leysa málin þegar hann fór til fundar við Armando laugardaginn 13. febrúar.  Hann hafi tekið með sér byssu ef svo kynni að fara að hann þyrfti að verja hendur sínar. 

Þegar þeir hafi hist hafi Armando rokið í átt að Angjelinmeð líflátshótunum og hann þá áttað sig á því að Armando myndi ekki bakka út úr hótunum sínum eða ráðagerðum um að drepa hann eða son hans. Angjelin hafi því ekki séð annan kost í stöðunni en að skjóta Armando. Réttarmeinafræðingur sem gaf skýrslu fyrir dómi sagði að Angjelin hefði verið minnst metra frá Armando þegar hann skaut hann níu sinnum. Þá bendir margt til þess að Armando hafi verið skotinn í bakið.

Verjandinn undrast að ákæruvaldið hafi ekki orðið við ítrekuðum óskum um að fá aðgang að þeim símagögnum sem lögreglan hafi lagt hald á hjá gengi Armando.  Þar kunni að vera upplýsingar sem geti varpað enn skýrara ljósi á aðdraganda þess að Armando lét lífið og hvers vegna Angjelin taldi sig þurfa að hitta Armando einan  Því er sömuleiðis hafnað að aðrir sakborningar í málinu hafi getað vitað eða séð fyrir að Angjelin myndi fremja þann verknað sem hann er ákærður fyrir.  

Morðið aldrei rannsakað sem örþrifaráð

Í greinargerðinni er einnig vikið að rannsókn lögreglu. Það er meðal annars gagnrýnt að hún skyldi aldrei hafa tekið mið af þeim möguleika að manndrápið „kynni að hafa verið einhvers konar örþrifaráð manns sem stafaði ógn af Armando og þeim skipulögðu glæpasamtökum sem hann tengdist.“

Verjandinn telur vísbendingar um að lögreglan hafi ekki gætt hlutleysis við rannsókn málsins og neitun eða þögn ákæruvaldsins um að afhenda eða afla ýmissa gagna leiði til vafa um hvað hafi gerst á bak við tjöldin.  Þá hafi túlkun í málinu verið verulega ábótavant og hún sé sumstaðar sannanlega röng.

Skýrslutökum í Rauðagerðismálinu lauk í gær og hafa verjendur og saksóknari nú viku til að undirbúa munnlegan málflutning. Að honum loknum líða minnst fjórar vikur þar til dómur liggur fyrir í málinu.

freyrgigja's picture
Freyr Gígja Gunnarsson
Fréttastofa RÚV