Athugið þessi frétt er meira en 3 mánaða gömul.

Niðurgreiðsla sálfræðiþjónustu strandar á samningaborði

Mynd: Rúnar Ingi Garðarsson / RÚV
Ekki hafa náðst samningar milli Sjúkratrygginga og sálfræðinga um niðurgreiðslu á sálfræðiþjónustu. Heilbrigðisráðherra segist þegar hafa tekið frá fjármuni í verkefnið en bíða þess að samið verði.

Mikil fjölgun hefur orðið á bráðakomum og innlögnum á Barna- og unglingageðdeild Landspítala í kórónuveirufaraldrinum og bið eftir þjónustu lengst um tvo mánuði. Fram kom í skýrslu um áhrif faraldursins á geðheilsu að sjötíu prósentum fleiri börn fái nú tilvísun í meðferð á BUGL vegna átröskunar.

„Ég lét ríflega hundrað milljónir inn til BUGL bara núna á dögunum. Þannig að ég vonast til að það hjálpi eitthvað til. Það auðvitað leysir ekki vandann,“ segir Svandís Svavarsdóttir heilbrigðisráðherra.

Aukið hafi verið við forvarnir og auknum fjármunum veitt í geðheilbrigðismál.

„Höfum í raun og veru aukið um milljarð á ársgrundvelli inn í þjónustuna og svo líka sértækar aðgerðir vegna covid, 540 milljónir á ári, 2020 og á þessu ári,“ segir Svandís.

Fylgst með mönnun heilbrigðisstétta

Fjölga eigi sálfræðingum hjá heilsugæslu. Fram kom í fréttum í gær að sögulega fáir geðlæknar séu við störf á Landspítalanum og lítil nýliðun í stéttinni.

„Það eru skilst mér þó nokkrir sem útskrifast 2022 og '23. Það hefur verið sett í gang á mínum tíma þetta landsráð um menntun og mönnun, þannig að við séum með þær upplýsingar á einum stað hvernig framtíðarsýnin er varðandi mönnun einstakra fagstétta í heilbrigðisþjónustu,“ segir Svandís.

Til stendur að ríkið niðurgreiði sálfræðiþjónustu en bið hefur verið á að það komist til framkvæmda. 

„Ég hef fjármagnað þetta nú þegar, með hundrað milljónum nú þegar, en það hefur ekki gengið vel að koma þeim peningum í lóg vegna þess að samningar hafa ekki gengið við sjálfstætt starfandi sálfræðinga,“ segir Svandís.