Athugið þessi frétt er meira en 9 mánaða gömul.

Grímulausa Katrínu misminnti hvernig reglurnar voru

20.08.2021 - 12:15
Mynd: Skjáskot / RÚV
Katrín Jakobsdóttir forsætisráðherra var ekki með grímu þegar hún var meðal áhorfenda á leik KR og Víkings í næst efstu deild kvenna í fótbolta. Hún segir að sig hafi misminnt og talið að ekki þyrfti að vera með grímu á íþróttaviðburðum utandyra ef góð fjarlægð væri milli fólks, eins og raunin hafi verið í gær. Hún segir að sér þyki leitt að hafa brotið reglur með þessum hætti.

„Ég hreinlega ætla að viðurkenna að mig misminnti,“ segir Katrín. „Ég taldi satt að segja að íþróttaviðburðir utandyra þar sem fjarlægð er tryggð, og hún var algjörlega tryggð á þessum leik þar sem voru ekki sérlega margir gestir og við vorum utandyra, þá minnti mig hreinlega að það væri ekki grímuskylda á íþróttaviðburðum utandyra. Það var misminni og mér þykir mjög leiðinlegt að hafa brotið reglur með þessum hætti.“

Katrín segir að einhverjir í kringum sig hafi verið með grímur en ekki allir. Hún segist hafa talið að hún og aðrir væru að gera rétt.

Vefurinn fótbolti.net greindi frá því í gærkvöld að forsætisráðherra hefði ekki verið með grímu.

„Ég frétti nú bara af þessari umræðu hér I morgun á ríkisstjórnarfundi,“ sagði Katrín í viðtali við fréttastofu að loknum ríkisstjórnarfundi. „Ég var grímulaus í góðri trú og taldi að þar sem langt var á milli mín og næstu manna og við vorum utandyra að ég væri að gera rétt. Ég er mannleg eins og aðrir og hefði betur flett upp á covid.is fyrir leikinn.“