Athugið þessi frétt er meira en 2 ára gömul.

Söngleikjahommi gerir upp líf sitt

Mynd: Aðsend / Bjarni Snæbjörnsson

Söngleikjahommi gerir upp líf sitt

14.08.2021 - 13:00

Höfundar

„Við viljum taka valdið úr orðinu, gera það okkar,“ segir Bjarni Snæbjörnsson leikari um titilinn á söngleik sínum, Góðan daginn faggi. Verkið er einleikur Bjarna þar sem hann notast við gamlar dagbókarfærslur. Ekkert sé meira viðeigandi fyrir söngleikjahomma eins og hann en að gera upp líf sitt á þennan hátt.

Sjálfsævisögulegi heimildasöngleikurinn Góðan daginn faggi var frumsýndur í Þjóðleikhúskjallaranum á dögum. Sýningin er samstarfsverkefni Þjóðleikhússins og leikhópsins Stertabendu og eru höfundar og aðstandendur verksins Bjarni Snæbjörnsson, leikari, Gréta Kristín Ómarsdóttir, leikstjóri, og Axel Ingi Árnason, tónskáld. Auk þess er gefið sýnishorn af glænýrri söngleikjatónlist sem prýðir verkið hér að neðan.  

Ekkert meira viðeigandi fyrir söngleikjahomma 

„Þetta er hundrað prósent mín saga sem við ákváðum að sviðsetja,“ segir Bjarni í samtali við Drífu Viðarsdóttur og Huldu Geirsdóttur í Morgunútvarpinu á Rás 2. Fyrir nokkrum árum fann Bjarni gamlar dagbækur og bréf. „Mér fannst þetta svo áhugavert, fyndið, óbærilegt og fáránlegt allt saman, eins og maður upplifir þegar maður les gamlar dagbókarfærslur eftir sjálfan sig.“  

Bjarni hugsaði með sér að hann yrði að gera eitthvað við þessa pappíra og heyrði í þeim Grétu Kristínu og Axel, spurði hvort þau ættu að gera einleikssöngleik og þau svöruðu með hrópandi jái „Enda er ekkert meira viðeigandi fyrir Bjarna, verandi söngleikjahommi, að setja upp ævi sína í svona söngleikjaformi,“ bætir Axel við.  

Söngleikurinn er bæði fyndinn og dramatískur þar sem ævi Bjarna er gerð upp af næmni þess manns sem hann er í dag. „Hvernig sjáum við þetta og hvernig þetta var, og hver var þetta í alvörunni þrátt fyrir að sá aðili, sem ég var, vissi það ekki þá.“ 

Semur alltaf stóra og dramatíska tónlist  

Þeim fannst upplagt að vera með söngleikjatónlist við þessa dramatísku gamansögu. „Sem Axel Ingi gerir svo listilega vel,“ segir Bjarni. Axel skrifar tónlistina fyrir mismunandi tímabil og tilfinningar sem komu upp við ferlið.  

Axel er menntað tónskáld og þrátt fyrir að hafa aldrei skrifað tónlist fyrir söngleik áður hefur hann oft fengið þá gagnrýni að verk hans séu svolítið leikræn. „Ég held að öll tónlist sem ég hef skrifað hafi verið að einhverju leyti söngleikjatónlist. Það er allt svo dramatískt og stórt og mikið,“ segir hann.  

Bjarni og Axel höfðu aldrei unnið saman en þekktust í gegnum Listaháskólann og sameiginlega vinkonu sína, Grétu Kristínu. „En svo vissi ég að hann væri líka smá söngleikjahommi,“ segir Bjarni. 

 

Mynd með færslu
 Mynd: Aðsend - Bjarni Snæbjörnsson / Axel Ing
Bjarni Snæbjörnsson og Axel Ingi Árnason flytja söngleikinn Góðan daginn faggi.

Afvopna orðið faggi 

Titill verksins er að mörgu leyti stuðandi: Góðan daginn faggi. „Þetta er alveg meðvitað,“ segir Bjarni. „Við viljum taka valdið úr orðinu, gera það okkar.“ Bjarni segir að tungumálið hafi mikið verið notað til þess að beita hinsegin fólk ofbeldi og því vilji þeir opna umræðuna. „Flestir hommar þekkja þá tilfinningu að þegar við vorum yngri var orðið hommi mjög ljótt. En við erum búnir að eigna okkur það,“ segir Axel. Þannig sé broddurinn og neikvæða merkingin farin úr orðinu - sem gefur til kynna að hægt sé að afvopna orð.  

„Þetta er alveg maraþon“ 

Verkið er einleikur Bjarna en Axel verður honum til halds og trausts við píanóið á sviðinu. „Þetta er alveg maraþon en það er mjög gaman og gefandi,“ segir Bjarni. Hann sé hissa á því eftir að hafa rennt í gegnum alla sýninguna nokkrum sinnum hversu mun minna mál það er en hann hélt að það yrði.  

Um er að ræða sjö söngleikjalög í heildina og eru textarnir byggðir að einhverju leyti á dagbókarfærslunum. Aðstandendurnir þrír sömdu textana saman. „Þar spilum við með okkar styrkleika,“ segir Axel, þau hafi skipt með sér verkum eftir hvað hentaði best. Setið verður við borð í Þjóðleikhúskjallaranum og verður hálfgerð kabarett-stemning að sögn Axels. 

Rætt var við Bjarna Snæbjörnsson og Axel Inga Árnason í Morgunútvarpinu á Rás 2.  

Tengdar fréttir

Leiklist

„Það var ég sem hataði mig“

Mannlíf

„Ég ætlaði aldrei að koma aftur hingað“