Athugið þessi frétt er meira en 3 mánaða gömul.

Óska upplýsinga vegna samráðs skipafélaga

Mynd með færslu
 Mynd: Kristín Sigurðardóttir
Nokkur af stærri innflutningsfyrirtækjum landsins hafa sent Samkeppniseftirlitinu beiðni um upplýsingar vegna sáttar Eimskips við eftirlitið, sem birt var um miðjan júní.

Þetta kemur fram á vef Félags atvinnurekenda, FA, en í hópi þeirra er sent hafa beiðnina eru félagsmenn í FA. Í sáttinni viðurkenndi Eimskip alvarleg brot á samkeppnislögum sem fólust í samráði við keppinautinn Samskip, m.a. um skiptingu markaða eftir stærri viðskiptavinum og um álagningu gjalda og afsláttarkjör í flutningaþjónustu. Þess er getið á vef FA að rannsókn á þætti Samskipa standi enn og að fyrirtækið hafi ekki viðurkennt samkeppnisbrot.

Upplýsingabeiðnin snýr að því hvort upplýsingar um viðkomandi fyrirtæki komi fram í gögnum rannsóknar Samkeppniseftirlitsins á samráði skipafélaganna og er farið fram á aðgang að gögnum málsins í heild sinni en til vara þeim gögnum sem varða einstaka fyrirtæki. 

Páll Rúnar M. Kristjánsson, lögmaður FA, hafði milligöngu um upplýsingabeiðni fyrirtækjanna til Samkeppniseftirlitsins. Í umfjöllun um málið í Viðskiptablaðinu í dag segir að brotin sem Eimskip hafi viðurkennt séu alvarleg brot á samkeppnislögum enda hafi fyrirtæki aldrei greitt hærri sekt vegna samkeppnisbrota.

„Umrædd samkeppnisbrot eru þess eðlis að þar eru bæði gerendur og þolendur. Þeir sem hafa þurft að þola brot hljóta að skoða bótarétt sinn gagnvart hinum brotlegu. Í ljósi þess hversu umfangsmikil brotin eru sem Eimskip hefur viðurkennt og yfir hversu langan tíma þau ná kann bótarétturinn að vera umtalsverður í ákveðnum tilvikum. Nú þegar eru nokkur fyrirtæki að skoða stöðu sína og búast má við að fleiri bætist við,“ er haft eftir Páli Rúnari í Viðskiptablaðinu.