Athugið þessi frétt er meira en 2 ára gömul.

Börn og foreldrar þurfa að ræða um bólusetningu

Mynd:  / 
Foreldrar og börn verða að ræða hvort þau ætla að þiggja bólusetningu við COVID-19, segir umboðsmaður barna. Hún segir að langflest tólf ára börn ættu að vera nægilega þroskuð til að ræða málið af skynsemi og taka verði tillit til þeirra skoðana. Séu foreldrar og börn ósammála megi hugsanlega bíða með bólusetningu og séu foreldrar innbyrðis ósammála sé hægt að leita ráðgjafar heilbrigðisstarfsfólks.

Börnum á aldrinum 12-15 ára verður boðin bólusetning dagana 23. og 24. ágúst. Börn sem verða 12 ára síðar á árinu, geta fengið bólusetningu síðar í haust. Á heimasíðu Heilsugæslu höfuðborgarsvæðisins kemur fram að foreldri eða forráðamaður sem vill að barn sitt verði bólusett þarf að fylgja barninu í bólusetninguna, eða senda einhvern sjálfráða í sinn stað með umboð meðferðis.

Hvað ef foreldrar vilja ekki láta bólusetja barn, en barnið vill bólusetningu?  

Eða ef barn vill ekki láta bólusetja sig en foreldrarnir vilja það?

En ef foreldrarnir eru innbyrðis ósammála, annar vill að barnið sé bólusett, hinn ekki og barnið er á milli steins og sleggju?

Salvör Nordal umboðsmaður barna leggur ríka áherslu á að það sé hlustað á vilja barnanna. Fjölskyldan verði að ræða saman og til þess þurfi að hafa góðar upplýsingar um ávinninginn og áhættuna. Hún bendir jafnframt á að ungmenni sem eru orðin 16 ára séu sjálfstæðir þjónustuþegar gagnvart heilbrigðiskerfinu og hafa því vald til að ákveða sjálf hvort þau vilji láta bólusetja sig eða ekki. 

Nýlega voru birtar upplýsingar Landlæknisembættisins um bólusetningar barna og unglinga sem skrifuð eru fyrir ungmenni. Þær eru á íslensku og ensku.

Upplýsingar um bólusetningu barna í 7.-10. bekk hafa jafnframt verið birtar. Þar er meðal annars fjallað um sjaldgæfar aukaverkanir hjá ungmennum eins og bólgur í gollurshúsi og að verið sé að skoða hvort bólusetning með bóluefni frá Pfizer/BioNTech geti haft áhrif á tíðahring stúlkna. Upplýsingarnar eru á íslensku, pólsku og ensku. 

Hér er nánar fjallað um bólusetningar barna og ungmenna í öllum landshlutum, rannsóknir, aukaverkanir og möguleika á yfirliði eftir bólusetningu barns. Upplýsingarnar eru á íslensku og ensku.

Mynd með færslu
 Mynd: Hólmfríður Dagný Friðjónsd - RÚV
Það þarf að huga aðeins öðruvísi að fjöldabólusetningu barna en fullorðinna, aðallega að gefa ungmennum svolítinn tíma og svigrúm að mati Umboðsmanns barna.

Flóknari framkvæmd en hjá fullorðnum

Salvör bendir á að það sé ýmislegt í framkvæmd fjöldabólusetningar á börnum og unglingum sem þurfi að hugsa um. „Það getur komið upp sú staða að forsjáraðili kemur með barni og að sá sem er að bólusetja skynjar að það eru efasemdir. Það þarf að vera einhver möguleiki til þess að ræða málin eða gefa einhvert svigrúm, þannig að þetta sé ekki bólusetning alveg eins og þegar fullorðna fólk var, þar sem við fórum tiltölulega hratt í gegn, heldur að það sé gefinn tími til þess að bregðast við, t.d ef það koma upp efasemdir hjá barni eða bæði barni og foreldri.“

Hún minnir líka á að það gætu komið upp efasemdir hjá börnum sem ekki eru íslenskumælandi og að það gæti þurft að huga að túlkaþjónustu. 

Það þurfi því að hugsa framkvæmdina aðeins öðruvísi, þegar börn eru annars vegar, umfram allt að gefa tíma og svigrúm til að ræða málin.

Valtýr Stefánsson Thors barnasmitsjúkdómalæknir á Barnaspítala Hringsins ræddi um veikindi og bólusetningar barna vegna COVID-19 við Hrafnhildi Halldórsdóttir og Hafdísi Helgu Helgadóttur í Síðdegisútvarpinu á Rás 2 í dag.

Mynd: Þór Ægisson / RÚV
Valtýr Stefánsson Thors barnasmitsjúkdómalæknir tekur í sama streng og Salvör Nordal umboðsmaður barna, að 12 ára börn séu fullfær um að mynda sér skoðun á bólusetningu.
ragnhildurth's picture
Ragnhildur Thorlacius
Fréttastofa RÚV