Athugið þessi frétt er meira en 2 mánaða gömul.

13 almennir borgarar myrtir í Miðafríkulýðveldinu

epa05047892 UN military soldiers from Bangladesh patrol during Poe Francis's visit in Bangui, Central African Republic, 29 November 2015. Pope Francis is on a last leg of a six days visit that will take him to Kenya, Uganda and the Central African
Friðargæsluliðar frá Bangladess í Mið-Afríkulýðveldinu. Mynd: EPA - ANSA
Þrettán almennir borgarar féllu í árás óþekktra vígamanna á þorp norður af Bangui, höfuðborg Miðafríkulýðveldisins í vikunni. Friðargæsla Sameinuðu þjóðanna í landinu greindi frá þessu í gær. AFP-fréttastofan hefur eftir talsmanni Friðargæslunnar að liðsmenn hennar hafi fundið 13 lík í Bongboto, um 300 kílómetra norður af Bangui, á miðvikudag.

Ekki er vitað um tildrög illvirkisins eða hverjir voru að verki en í yfirlýsingu Friðargæslunnar segir að allt kapp verði lagt á að komast að hinu sanna og draga ódæðismennina fyrir rétt.

Næst-vanþróaðasta ríki heims

Afar róstusamt hefur verið í Miðafríkulýðveldinu um margra ára skeið. Landið er næst-vanþróaðasta ríki heims samkvæmt skilgreiningum Sameinuðu þjóðanna og glímir enn við eftirköst blóðugs borgararstríðs sem þar braust út 2013.

Núverandi ríkisstjórn kennir hreyfingu stjórnarandstæðinga um morðin í Bongboto. Sú hreyfing kallar sig Samfylkingu föðurlandsvina um breytingar og var stofnuð í desember á síðasta ári með það fyrir augum að koma forsetanum Faustin Archange Touadera frá völdum.