Athugið þessi frétt er meira en 11 mánaða gömul.

Tvöfalt fleiri gistinætur í maí á þessu ári

Mynd með færslu
Myndin er úr safni. Mynd: RÚV
Greiddar gistinætur á öllum tegundum gististaða í maí síðastliðnum jukust um 104,0% samanborið við maí ári 2020. Þar af jukust gistinætur á hótelum um 173,6%, um 55,6% á gistiheimilum og um 51,6% á öðrum tegundum skráðra gististaða, að því er fram kemur á vef Hagstofunnar.

Með öðrum tegundum skráðra gististaða er átt við farfuglaheimili,  orlofshús o.s.frv. Greiddar gistinætur ferðamanna á öllum gististöðum voru um 181.800 í maí en þær voru um 89.100 í sama mánuði árið áður. Íslenskar gistinætur voru um 60% gistinátta, eða 108.400, en erlendar 40% eða 73.400. Gistinætur á hótelum og gistiheimilum voru um 135.700, þar af 102.800 á hótelum og 46.100 á öðrum tegundum skráðra gististaða.

Íslendingar í meirihluta hótelgesta í maí

Gistinætur á hótelum í maí 2021 voru 102.800 og jókst hótelgisting í mánuðinum í öllum landshlutum. Mest var aukningin á höfuðborgarsvæðinu þar sem gistinætur fóru úr 8.700 í 42.700 á milli ára. Gistinætur Íslendinga voru 64.700, eða 63% af hótelgistinóttum, á meðan erlendar gistinætur voru 38.100 eða 37%.

Minna framboð, betri nýting

Á meðan dróst framboð hótelherbergja í maí saman um 5,7% frá maí á síðasta ári en herbergjanýting á hótelum jókst aftur a móti um 16,7% frá fyrra ári. Hún var þó ekki nema 25,7%.Á tólf mánaða tímabili frá júní 2020 til maí 2021 var heildarfjöldi gistinátta á hótelum um 914.500 sem er 76% fækkun frá sama tímabili ári áður. Mest var fækkunin á höfuðborgarsvæðinu eða 86%.

Fram kemur á vef Hagstofunnar að þar sem landamærarannsókn Ferðamálastofu og Hagstofu Íslands lá enn niðri í maí, vegna mikillar fækkunar brottfara frá Keflavíkurflugvelli, var ekki unnt að áætla fjölda erlendra gistinátta á stöðum sem miðla heimagistingu í gegnum Airbnb og svipaðar síður.

 

Jón Agnar Ólason