Athugið þessi frétt er meira en 4 mánaða gömul.

Nærri 50 króna munur á bensínlítranum

28.06.2021 - 22:45
Mynd: RÚV / RÚV
Nærri 50 króna verðmunur er á ódýrasta bensínlítranum og þeim dýrasta. Þannig er 64.000 krónum dýrara á ári að kaupa bensín á fjölskyldubílinn ef alltaf er keypt þar sem dýrast er en ef dælt er þar sem verðið er lægst. Hægt er að spara sér töluverðar fjárhæðir með að aka nokkra kílómetra milli stöðva á höfuðborgarsvæðinu.

Lægsta verðið á bensínlítranum er 209 krónur hjá Costco en þar þarf að greiða árgjald. Hæsta verðið er hjá N1 eða rétt tæpar 255 krónur lítrinn, eða hátt í 50 krónum hærra. 

„Ef við tökum hefðbundinn heimilisbíl sem eyðir sjö lítrum á hundraði og er ekinn kannski 20.000 kílómetra á ári, þá þarf að borga 64 þúsund krónum meira fyrir eldsneytið þar sem það er ódýrast,“ segir Runólfur Ólafsson.

Ef við skellum okkur í ferðalag frá Reykjavík og kaupum bensín fyrir tíu þúsund krónur, þá komumst við á ódýrasta bensíninu til Reyðarfjarðar. Ef sama leið væri farin en bensín tekið á dýrasta staðnum kæmust við 120 kílómetrum styttra eða til Djúpavogs.

Á höfuðborgarsvæðinu þarf oft ekki að fara langt til að komast í ódýrara bensín. Þannig geta viðskiptavinir Atlansolíu sparað sér 30 krónur með því að hætta við að dæla á bílinn við Hafnarfjarðarhöfn og fara þess í stað í Kaplakrika sem er átta kílómetra í burtu. Þeir sem skipta við N1 geta sparað 35 krónur með því að aka átta kílómetra frá Stórahjalla og að bensínstöðinni á Reykjavíkurvegi. Og viðskiptavinir ÓB geta sparað 38 krónur á lítra með því að aka frá Suðurhellu, tíu kílómetra leið að Bæjarlind.

Lægsta verðið er iðullega í nágrenni Costco.

„Ég held að þessi eina stöð, Costco í Kauptúni, sé að selja hátt í fimmtán prósent af heildarmagni eldsneytissölu á Íslandi,“ segir Runólfur.

En hvað getur skýrt 50 króna mun? Er Costco að borga með eldsneytinu eða erum við að fá meiri þjónustu þegar við borgum 50 krónum meira?

„Aðalskýringin er álagning,“ segir Runólfur.

Oftast situr landsbyggðin uppi með hæsta eldsneytisverðið.

„Við sjáum það að þetta er bara verðstýringarstefna af því að þessi fyrirtæki eru að reka önnur fyrirtæki sem eru að selja þjónustuvörur fyrir heimilin og matvöru á sama verði um land allt,“ segir Runólfur.