Athugið þessi frétt er meira en 5 mánaða gömul.

Segir mat um afturkræfa erfðablöndun óforsvaranlegt

26.06.2021 - 09:34
Mynd með færslu
 Mynd: Birgir Þór Harðarson - RÚV
Skipulagsstofnun hefur gefið álit sitt um mat á umhverfisáhrifum fyrirhugaðs sjókvíaeldis Fiskeldis Austfjarða hf. í Stöðvarfirði þar sem áætlað er að framleiða um 7.000 tonn af laxi á ári í sjókvíaeldi. Þar segir að eldi á frjóum laxi komi ekki til greina með óbreyttu áhættumati.

Í matsskýrslu Fiskeldis Austfjarða hf.  kemur fram að eldið verði í samræmi við áhættumat Hafrannsóknastofnunar vegna mögulegrar erfðablöndunar milli eldislaxa og náttúrulegra laxastofna. Fyrirliggjandi áhættumat erfðablöndunar gerir ekki ráð fyrir eldi á frjóum laxi í Stöðvarfirði og vegna þeirra takmarkana er aðeins áformað að  notast við ófrjóan eldislax.

Sætir furðu að fyrirtækið meti áhrifin afturkræf

Í matsskýrslunni kemur jafnframt fram að áhættumatið verður endurskoðað reglulega og komi til þess að endurskoðun heimili eldi á frjóum laxi, þá áskilur Fiskeldi Austfjarða sér rétt til að hefja eldi á frjóum laxi. Af þeim sökum mat Skipulagsstofnun umhverfisáhrif eldis á frjóum eldislaxi í nýju umhverfismati sínu og kemst að þeirri sömu niðurstöðu að ekki sé heimilt að notast við frjóan eldislax.

Skipulagsstofnun telur þá niðurstöðu Fiskeldis Austfjarða í matsskýrslu að áhrif eldis á frjóum laxi á erfðablöndun verði óveruleg og afturkræf óforsvaranlega. Þá sæti það furðu að í matsskýrslu skuli áhrifin metin afturkræf í ljós þess að í matsskýrslunni sé vísað í nýlega norska rannsókn sem leiddi í ljós að breytingar hafa átt sér stað á erfðasamsetningu 115 af 175 laxastofnum sem skoðaðir voru í þeirri rannsókn. Að mati stofnunarinnar er um augljóst vanmat að ræða.

Hafrannsóknastofnun hefur verið falið að gera tillögu til ráðherra um það magn frjórra laxa sem heimila skal að ala í sjó hverju sinni á tilteknu hafsvæði á grundvelli áhættumats erfðablöndunar. Markmið áhættumatsins er að koma í veg fyrir hugsanleg spjöll á villtum nytjastofnum. Núgildandi áhættumati er frá 11. maí 2020 og heimilar ekki frjóan lax í Stöðvarfirði. 

Ice Fish Farm AS er norskt eignarhaldsfélag Fiskeldis Austfjarða. Fyrirtækið tilkynnti norsku  kauphöllinni þar sem það er skráð í fyrradag að hafnar væru viðræður við Laxa fiskeldi um mögulegan samruna fyrirtækjanna.

Valgerður Árnadóttir
Fréttastofa RÚV