„Við fórum strax að skoða svæðið sem varð fyrir áhrifum af jarðskjálftahrinunni. Það var ekki vitað hvar kvikan myndi koma upp svo við fórum í að skrá minjar á svæðinu og safna gögnum um minjarnar. Það voru einhverjar skráningar fyrir en gögnin voru ekki mjög aðgengileg þannig við byrjuðum á þessu, “ segir Oddgeir.
Hann segir þónokkuð vera um verminjar í landi Ísólfsskála sem hafa verið kortlagðar. Talið er að þar hafi jafnvel verið minjar frá landnámsöld en þær elstu séu þó líklega farnar í sjó þar sem mikið hefur verið um landbrot á svæðinu. Oddgeir telur að skálinn geti mögulega sloppið við að verða undir hrauninu en hann hafi meiri áhyggjur af Grindavík. Þar er til að mynda, Þórkötlustaðahverfi sem er verndað svæði í byggð og jafnframt elsta byggðin.
Oddgeir segir skráninguna vera einfaldasta verndunarformið en verkið sé þó kapphlaup við bæði tímann og hraunið. Nú sé teymi Minjastofnunar að einbeita sér að Grindavíkur og nágrenni en næst sé allur Reykjanesskagi undir.
